بھارت کے دارالحکومت نئی دہلی میں ڈنمارک سفارتخانے کے اطراف کچرے کے ڈھیر سے تنگ آ کر سفیر خود ویڈیو جاری کرنے پر مجبور ہوگئے۔
بھارت میں تعینات سفیر فریڈی سوان نے سماجی رابطوں کی سائٹ ایکس پر اپنے ذاتی اکاؤنٹ سے ایک ویڈیو جاری کی اور پوسٹ میں ڈنمارک سفارتخانے، وزیر اعلیٰ اور نئی دہلی کے گورنر کو ٹیگ کیا۔
فریڈی سوان نے ٹوئٹ کے کیپشن میں لکھا کہ ویسے تو خوبصورت اور گرین نئی دہلی جیسے نعرے لگائے جاتے ہیں لیکن حقیقت میں یہ دیکھ کر افسوس ہوا۔
ویڈیو کلپ میں فریڈی سوان کو سفارتخانے کی دیوار کے ساتھ کچی سڑک پر دیکھا جا سکتا ہے اور ان کے اردگرد کچرے کا ڈھیر اور ملبہ موجود ہے۔
Lovely and green New Delhi. Many words but no action. Saddened by this @DenmarkinIndia @CMODelhi @LtGovDelhi pic.twitter.com/ZRH9wutfsm
— daikanyama (@svane_freddy) May 8, 2024
انہوں نے ڈنمارک اور یونانی سفارتخانے کی عمارتوں کی طرف اشارہ کرتے ہوئے کہا کہ یہاں ڈنمارک اور دوسری طرف یونانی سفارتخانہ ہے، درمیان میں سروس لین ہونی چاہیے لیکن لوگ یہاں کچرا پھینکتے ہیں۔
فریڈی سوان نے کہا کہ مجھے امید ہے کوئی ہماری آواز سن کر اس مسئلے کو حل کرے گا، الفاط نہیں بلکہ عملی اقدامات ہونے چاہییں۔
بعدازاں، سفیر کی ویڈیو کا نوٹس لیتے ہوئے نئی دہلی میونسپل کونسل (این ڈی ایم سی) نے علاقے سے کچرے صاف کیا اور سفیر کے توجہ دلانے پر ان کا شکریہ ادا کیا۔
