عامر خان نے اپنی نئی آنے والی فلم لال سنگھ چڈھا کی تاریخ نمائش ایک بار پھر آگے بڑھا دی ہے اب یہ فلم 11 اگست کو ریلیز ہوگی۔
بالی ووڈ کے نامور اداکار عامر کی ایک دنیا پرستار ہے اور جب بات ہو ان کی نئی فلم کی تو ان کے فینز اس کا بڑی شدت سے انتظار کرتے ہیں، کیونکہ عامر خان فلموں کے انتخاب کے حوالے سے کافی محتاط رہتے ہیں اور ان کے پرستاروں کو ان کی نئی فلم کا کافی وقت تک انتظار کرنا پڑتا ہے۔
عامر خان ان دنوں فلم لال سنگھ چڈھا میں جلوہ گر ہونے جارہے ہیں لیکن ان کے پرستاروں کو یہ جان کر مایوسی ہوگی کہ اس فلم کی ریلیز میں ایک بار پھر تاخیر ہورہی ہے۔
عامر خان، کرینہ کپور خان اور مونا سنگھ جیسے ستاروں سے سجی فلم لال سنگھ چڈھا کو پہلے 2021 کی کرسمس کے موقع پر دسمبر میں ریلیز کرنے کا اعلان کیا گیا تھا تاہم اس کو آگے بڑھا کر یہ تاریخ 14 اپریل کردی گئی۔
تاہم اب اس فلم کی نمائش کی تاریخ کو ایک بار پھر آگے بڑھا دیا گیا ہے اور اس کی وجہ یہ بتائی جارہی ہے کہ یہ فلم ابھی بھی تکمیل کے مراحل میں ہے۔
انسٹاگرام پر عامر خان پروڈکشن کی جانب سے اعلامیہ جاری کیا گیا ہے جس میں بتایا گیا ہے کہ فلم لال سنگھ چڈھا کو اب 14 اپریل کو ریلیز نہیں کیا جارہا کیونکہ ہم اس تاریخ تک فلم مکمل نہیں کرپائیں گے۔
اعلامیہ میں فلم کی ریلیز کی ایک بار پھر نئی تاریخ دیتے ہوئے کہا گیا ہے کہ اب فلم لال سنگھ چڈھا کو گیارہ اگست کو دنیا بھر میں ریلیز کیا جائے گا۔
بالی ووڈ فلم لال سنگھ چڈھا ہالی ووڈ فلم فوریسٹ گمپ کا ریمیک ہے جس میں عامر خان کے ساتھ ساتھ کرینہ کپور خان اور مونا سنگھ بھی جلوہ گر ہورہی ہیں جب کہ فلم میں جنوبی بھارت کے اداکار ناگر جونا کے بیٹے ناگا چیتنیا بھی اپنا بالی ووڈ ڈیبیو کرنے جارہے ہیں۔
واضح رہے کہ اداکاروں کا یہ ٹرائیکا 13 سال بعد کسی ایک فلم میں اکھٹا ہورہا ہے اس سے قبل فلم 2009 میں ریلیز ہونے والی بلاک بسٹر فلم تھری ایڈیٹس میں تینوں اداکاروں نے اپنی اداکاری کے رنگ بکھیرے تھے۔
