نائب تحصیلدار نے بھیک مانگنے پر بھکاری کو لات ماردی، جس کے باعث بھکاری ٹرک کی زد میں آکر موقع پر ہی ہلاک ہوگیا۔
غیر ملکی ذرائع ابلاغ کے مطابق نظام ساگر کنال کے علاقے میں رہنے والا شیورام نامی بھکاری مامڑ پلی سگنل پر گاڑیوں کے شیشے صاف کر کے بھیک مانگ کراپنا گزر بسر کرتا تھا۔
نائب تحصیلدار راج شیکھر اپنا کام ختم کر کے واپس اپنی منزل کی جانب جارہے تھے کہ مامڑ پلی چوراہے پر سگنل بند ہونے پر ان کی گاڑی رُک گئی، اسی دوران بھکاری نے موقع غنیمت جانتے ہوئے گاڑی کے شیشے صاف کر کے پیسے مانگنا شروع کردیئے۔
راج شیکھر نے بھکاری کو کہا کہ پیسے نہیں ہیں اور ٹریفک سگنل گرین ہونے پر راج شیکھر نے گاڑی کو آگے بڑھایا۔ تاہم بھکاری شیورام پیسے مانگتے ہوئے گاڑی کے ساتھ ساتھ دوڑنے لگا، غصہ کے عالم میں ڈی ٹی راج شیکھر نے کار سے باہر نکل کر شیورام کولات ماردی۔
جس کے باعث وہ نیچے گر پڑا، ٹھیک اُسی وقت ایک ٹرک گزر رہا تھا اور بھکاری اس ٹرک کے نیچے آکر موقع پر ہی جان کی بازی ہار گیا۔ پولیس نے سی سی ٹی وی فوٹیج کی مدد سے شناخت کرکے نائب تحصیلدار راج شیکھر کو گرفتار کرکے مقدمہ درج کرلیا۔
بھارت: رکن اسمبلی نندیتا کی پوسٹ مارٹم رپورٹ میں اہم انکشاف
بھارتی میڈیا کا کہنا ہے کہ راج شیکھر بھیمگل ڈویژن کے ٹی این جی او میں اہم ذمہ داریوں پر فائز ہیں اور مینڈورہ منڈل کے ڈی ٹی کے طور پر خدمات انجام دے رہے ہیں۔ ایک ایسے شخص کی جانب سے بھکاری کو لات مارنے پر ان پر شدید تنقید کی جارہی ہے۔