کراچی: چیئرمین پاکستان پیپلز پارٹی بلاول بھٹو کا کہنا ہے کہ ہم نے ہر قسم کے سیلکٹڈ کا مقابلہ کیا، عمران خان کیا چیز ہے؟۔
تفصیلات کے مطابق کراچی کے بلدیاتی انتخابات میں کامیابی کے بعد ٹاور پر ‘شکریہ کراچی’ کے نام سے منعقدہ جلسہ عام سے خطاب کرتے ہوئے بلاول بھٹو نے کراچی سمیت سندھ بھر میں بلدیاتی انتخابات جتوانے پر عوام کا شکریہ ادا کیا۔
بلاول بھٹو نے کہا کہ عوام نے کشمور سے کراچی تک پی پی پر اعتماد کیا،ماضی میں سندھ میں تقسیم کی سیاست چلتی تھی، آج عوام نے تقسیم کی سیاست دفن کردی، سندھ ایک ہے، ایک تھا اور ہمیشہ رہے گا۔
انہوں نے کہا کہ بلدیاتی الیکشن میں کراچی میں صرف ٹریلردکھایاہے،کراچی نے پی ٹی آئی کو خداحافظ کہہ دیاہے اب پورےملک سے بھی ان سیاسی دہشت گردوں کو فارغ کریں گے۔
چیئرمین پاکستان پیپلز پارٹی نے کہا کہ ہم نے سندھ سےآمریت کی باقیات کو ختم کردیا، پی پی نےثابت کردیا کہ وہ الیکشن لڑنااورجیتناجانتی ہے،ہم الیکشن سےنہیں بھاگتے،پی پی ہروقت الیکشن کے لئے تیارہے،جب بھی الیکشن ہونگے ہم اپنےمخالفین کو ووٹ کی طاقت سے ہرائیں گے۔
چیئرمین پی ٹی آئی کو مخاطب کرتے ہوئے بلاول بھٹو نے کہا کہ پیپلز پارٹی نے ہرقسم کے سلیکٹڈ کامقابلہ کیا ہے، ہم نے اصل دہشت گردوں کا مقابلہ کیا، کراچی میں بانی ایم کیو ایم کی سیاست کومنہ دیا یہ عمران کیا چیز ہے؟
چیئرمین پی ٹی آئی عمران خان کو تنقید کا نشانہ بناتے ہوئے بلاول بھٹو نے کہا کہ یہ آج تک لاڈلے ہیں،انہوں نےاصل اپوزیشن بھی نہیں دیکھی،ابھی تک ہرکونے میں ان کےسہولت کارموجودہیں، پوری قوم نے دیکھا کہ یہ خود کو بہادرلیڈرکہلواتاہےمگربالٹی سرپررکھےبغیرگھرسےنہیں نکلتا۔
انہوں نے کہا کہ کپتان ایک رات بھی پولیس گیسٹ ہاؤس میں برداشت نہیں کرسکا عدالت میں جاکر کہتا ہے مجھے ضمانت دو، اس نے ایک ہفتہ جیل میں گزارنے کے خوف سے ملکی ادارے پر حملہ کرایا، پورے پاکستان کو جلادیا، ہماری پیپلز بس سروس کا کیا قصور تھا؟ کراچی میں آگ لگائے گئے کے ایم سی کے واٹر ٹینکر کا کیا قصور تھا؟
اپنے خطاب میں بلاول بھٹو کا کہنا تھا کہ ہمیں کامیابی ملی،ہمارا وقت اس چیز میں ضائع نہیں ہوگاکہ مخالفین کوپکڑناہے،بلدیاتی الیکشن میں جیت کےبعد اس نظام کو نچلی سطح تک پہنچائیں گے،بلدیاتی اور صوبائی حکومت ساتھ مل کر صحت کیلئےپروگرام لیکر آئیں گے۔
انہوں نے خبردار کیا کہ الیکشن کمیشن ہمارے میئر،چیئرمین منتخب کرائے ورنہ پی پی احتجاج کرنا بھی جانتی ہے۔
