کراچی: پیپلزپارٹی کے چیئرمین بلاول بھٹو زرداری کراچی میں جلسے سے خطاب کرتے ہوئے کہا کہ سندھ میں طوفان اٹھ رہا ہے، ہوش کے ناخن لیے جائیں اور جزائر آرڈیننس واپس لیا جائے۔
اے آر وائی نیوز کی رپورٹ کے مطابق چیئرمین پیپلزپارٹی بلاول بھٹو زرداری نے کراچی میں پی ڈی ایم کے جلسے سے خطاب کرتے ہوئے کہا کہ ہم نے شہدائے جمہوریت کا قرض ادا کرنا ہے، انقلاب کی صبح دکھائی دے رہی ہے، آج تاریخ کے اہم موڑ پر کھڑے ہیں، ملک کی تمام جمہوری طاقتوں نے جمہوریت کے قیام کی جنگ لڑنی ہے۔
انہوں نے کہا کہ اگر بدھ تک آرڈیننس واپس نہیں لیا توسینیٹ میں قرارداد پاس کرکے آرڈیننس کو باہر کردیں گے، جزیرے کسی کے باپ کی جاگیر نہیں سندھ بلوچستان کی ملکیت ہے قبضہ نہیں کرنے دینگے۔
مزید پڑھیں: میں ایک نہیں دو بچوں کی نانی ہوں، مریم نواز
بلاول بھٹو نے کہا کہ حاکم وقت کے ظلم کےخلاف اٹھنے والی آوازوں کا گلہ گھونٹا جارہا ہے، ظلم پھرظلم ہے بڑھتا ہے تو مٹ جاتا ہے، یہ اقتدارکی لڑائی نہیں، سب آزادیوں کا ضامن جمہوری نظام ہے۔
چیئرمین پیپلزپارٹی نے کہا کہ اس حکومت نےعوام کو بنیادی حقوق دینے کا وعدہ توڑ دیا، آج غریب پس رہا ہے، ہائی ویز پرہماری بچیوں بہنوں کا ریپ کیا جا رہا ہے، اس کوعوام کی بھوک،غصہ نظرنہیں آتا، اس دورمیں عوام نے تاریخی مہنگائی، غربت دیکھی۔
انہوں نے کہا کہ جمہوریت کی جنگ عوام کی جنگ ہے، جمہوریت نہ ہوتو فیصلےعوام نہیں چند لوگوں کی مرضی سے ہوتے ہیں، یہ حکومت ناکام ہوچکی ہے اسے جانا پڑے گا۔
