کراچی: چیئرمین پیپلزپارٹی بلاول بھٹو نے مسلم لیگ ن کے صدر شاہد خاقان عباسی کا شوکاز نوٹس پھاڑ کر پھینک دیا۔
اے آر وائی نیوز کی رپورٹ کے مطابق چیئرمین پیپلزپارٹی بلاول بھٹو کی زیر صدارت پیپلزپارٹی سینٹرل ایگزیکٹو کمیٹی (سی ای سی) کا اجلاس ہوا جس میں پی ڈی ایم کے شوکاز نوٹس کا معاملہ زیر بحث آیا۔
ذرائع کے مطابق بلاول بھٹو نے شرکا کو شاہد خاقان عباسی کا شوکاز نوٹس پڑھ کر سنایا اور پھر اسے پھاڑ کر پھینک دیا۔
ذرائع کا کہنا ہے کہ شوکاز نوٹس پھاڑے جانے پر سی ای سی کے شرکا کی جانب سے تالیاں بجائی گئیں، بلاول بھٹو کا کہنا تھا کہ ہم سیاست عزت کے لیے کرتے ہیں، عزت سے بڑھ کر کوئی چیز نہیں ہے۔
یہ پڑھیں: اے این پی نے پی ڈی ایم سے علیحدگی کا اعلان کر دیا
واضح رہے کہ مسلم لیگ ن کی جانب سے عوامی نیشنل پارٹی (اے این پی) اور پیپلزپارٹی کو شوکاز نوٹس بھیجے گئے تھے جس کے بعد اے این پی نے پاکستان ڈیمو کریٹک موومنٹ (پی ڈی ایم) سے علیحدگی کا اعلان کیا تھا۔
اے این پی کے قائمقام صدر امیر حیدر ہوتی کا کہنا تھا کہ پی ڈی ایم کے نائب صدر کے عہدے سے استعفی دیتا ہوں، میاں افتخار بھی مزید پی ڈی ایم کے ترجمان نہیں ہوں گے۔
امیر حیدر ہوتی کا کہنا تھا کہ پی ڈی ایم کب ایک واحد جماعت بن گئی ہے؟ شوکاز نوٹسز ایک سیاسی جماعت کے اندر دیے جاتے ہیں، اے این پی کے کسی فرد کو شوکاز نوٹس صرف اسفندیار ولی ہی دے سکتے ہیں، کسی کو یہ اختیار نہیں کہ ہمیں شوکاز نوٹس دے۔
مزید پڑھیں: پی ڈی ایم پلیٹ فارم سے تنقید، پی پی کا ن لیگ کی حمایت نہ کرنے کا فیصلہ
یاد رہے کہ گزشتہ دنوں پیپلزپارٹی نے پی ڈی ایم کے پلیٹ فارم سے ہونے والی تنقید کے بعد کراچی کے حلقہ این اے 249 میں مسلم لیگ ن کی حمایت نہ کرنے کا فیصلہ کیا تھا۔
مسلم لیگ ن کی جانب سے حلقہ این اے 249 کے لیے مفتاح اسماعیل کو ٹکٹ جاری کیا گیا ہے، عوامی نیشنل پارٹی اور جمعیت علما اسلام ف کے امیدوار لیگی امیدوار کے حق میں دستبردار ہوچکے ہیں جبکہ پیپلزپارٹی کے امیدوار قادر مندوخیل ہیں۔
