The news is by your side.

Advertisement

برڈ فلو کی انسانوں میں منتقل ہونے والی قسم کیا ہے ؟ جانیے

چین میں برڈ فلو کے پہلے انسانی انفیکشن کی تصدیق ہوئی ہے اس حوالے سے بیجنگ کے نیشنل ہیلتھ کمیشن (این ایچ سی) نے کہا ہے کہ مشرقی صوبے جیانگسو میں 41 سالہ شخص میں یہ وائرس پایا گیا ہے۔

برطانوی خبر رساں ایجنسی روئٹرز کے مطابق ایچ 10 این 3 کے نام سے پہچانے والے برڈ فلو کے شکار زنجیانگ کے رہائشی کو 28 اپریل کو اسپتال میں داخل کیا گیا تھا اور 28 مئی کو خون کے نمونے میں بیماری کی تصدیق کی گئی۔

نیشنل ہیلتھ کمیشن کے مطابق مریض کی حالت خطرے سے باہر ہے۔ کمیشن نے مریض کے متاثر ہونے کی تفصیل نہیں بتائی تاہم کہا ہے کہ ’اس کے قریبی افراد کے طبی معائنے میں مزید کوئی کیس سامنے نہیں آیا اور برڈ فلو کے پھیلاؤ خطرہ نہایت کم ہے۔

ایچ 10 این 3 یا برڈ فلو کیا ہے؟

فوڈ اینڈ ایگریکلچر آرگنائزیشن کے مطابق اس وائرس کے بارے میں بہت کم معلومات ہیں اور یہ کبھی کبھار پرندوں میں نمودار ہوتا ہے اور زیادہ خطرہ نہیں بنتا۔

عالمی ادارہ صحت (ڈبلیو ایچ او) نے کہا ہے کہ چونکہ اس امر کی ابھی تک معلومات نہیں کہ مریض کو برڈ فلو وائرس کہاں سے لگا اور مقامی آبادی میں مزید کوئی کیس بھی سامنے نہیں آیا اس لیے انسانوں کو ایک دوسرے سے اس بیماری کے لگنے کی ابھی تک کوئی علامات نظر نہیں آتیں۔

خیال رہے کہ ایوین انفلوئنزا وائرس پرندوں پر بہت ہی کم اثرانداز ہوتا ہے مگر انسانوں کے لیے نہایت خطرناک ثابت ہوتا رہا ہے۔ چین میں اس وائرس کی ایک قسم ایچ 7 این 9 سے سال2017 میں تقریباً 300 افراد ہلاک ہوئے تھے۔

ڈبلیو ایچ او کے مطابق ایچ7 این9 وائرس کے بعد انسانوں کو ایک سے دوسرے میں منتقل ہونے کے بہت ہی کم واقعات ہوتے ہیں۔

خطرات کیا ہیں؟

چین میں برڈ فلو کے حالیہ وائرس کے پھیلاؤ کے بارے میں ماہرین کا خیال ہے کہ یہ بہت کم رہے گا اور کیسز خال خال ہی آسکتے ہیں۔ چین میں ایسے وائرس کے کیسز وقتاً فوقتاً سامنے آتے رہتے ہیں جہاں جنگلی اور پالتو پرندوں کی ہزاروں اقسام پائی جاتی ہیں۔

Comments

یہ بھی پڑھیں