ممبئی: بالی وڈ فلم’ستیہ پریم کی کتھا‘ کے پروڈیوسر ساجد ندیاد والا نے پاکستانی سُپر ہٹ نمبر ‘پسوڑی‘ کا ری میک بنانے کا اعلان کردیا۔
بھارتی میڈیا رپورٹس کے مطابق اداکار کارتک آریان اور پروڈیوسر ساجد ندیاد والا نے 29 جون کو ریلیز ہونے والی فلم ’ستیہ پریم کی کتھا‘ کے لئے عالمی ریکارڈ یافتہ کوک اسٹوڈیو پاکستان کے گانے ’پسوڑی‘ کا ری میک بنانے کا اعلان کر دیا ہے،
میڈیا رپورٹس کے مطابق اس فلم کا ٹریلر پہلے ہی جاری کردیا گیا ہے تاہم اب اس فلم میں پسوڑی کا مزید اضافہ کیا جارہا ہے جس کی شوٹنگ آج سے شروع ہوگی۔
29 جون کو ریلیز ہونے والی اس فلم کے لئے اس نئے گانے کی شوٹنگ آج سے ممبئی میں شروع ہو رہی ہے جو کہ کم و بیش 2 دن تک جاری رہے گی۔
خیال رہے کہ سمیر ودھوانس کی ہدایت کاری میں بننے والی اس فلم میں اداکار کارتک آریان کے ساتھ اس فلم کی اداکارہ کیارا ایڈوانی مرکزی کردار نبھارہی ہیں جبکہ دیگر کاسٹ میں گجراج راؤ، راج پال یادیو و دیگر شامل ہیں۔
یاد رہے کہ ’پسوڑی‘ کو علی سیٹھی اور شائے گِل نے روایتی پاپ انداز میں گایا ہے، گانے کی شاعری بھی علی سیٹھی نے فضل عباس کے ہمراہ لکھی ہے جب کہ اسے انہوں نے موسیقار ذوالفقار جبار خان المعروف زلفی کے ہمراہ کمپوز کیا ہے۔
