کراچی : عید پر بچوں کے ساتھ شاپنگ کیلئے جانے والے پاکستانی نژاد کینیڈین امین علوی کے قتل میں ملوث 2ملزمان کو گرفتار کرلیا گیا۔
کراچی کے ڈسٹرکٹ سینٹرل میں پاپوش پولیس نے کارروائی کرکے پاکستانی نژاد کینیڈین کے قتل میں ملوث 2ملزمان گرفتار کرلیا۔
گرفتار ملزمان میں ظہیر اور خلیل شامل ہیں ملزمان نے دوران تفتیش قتل کا اعتراف کرلیا، ایس ایس پی سینٹرل کا کہنا ہے کہ مقتول امین علوی بچوں کو شاپنگ کیلئے لے کر نکلا تھا، جسے ناظم آباد بورڈ آفس کے قریب ڈکیتی مزاحمت پر جان سے مار دیا گیا۔
ایس ایس پی سینٹرل معروف عثمان کے مطابق امین علوی منی چینجر سے رقم تبدیل کروانے لیے اندر گیا، ملزمان سڑک کی دوسری جانب موجود تھے۔
مقتول منی چینجر سے نکلا تو ملزمان اس کا تعاقب کرتے ہوئے پیچھے لگ گئے، ڈکیتی میں مزاحمت پر ملزمان نے گولی ماردی اور فرار ہوگئے، گرفتار ہونے والا ایک ملزم سرجانی جبکہ دوسرا منگھوپیر کا رہائشی ہے۔
یاد رہے کہ 28 جون کو کراچی کے علاقے ناظم آباد بورڈ آفس کے قریب ڈکیتی مزاحمت پر پاکستانی نژاد کینیڈین شہری کے قتل کا مقدمہ درج کیا گیا تھا۔
میڈیا رپورٹس کے مطابق واقعے کا مقدمہ مقتول کی بہن کی مدعیت میں پاپوش نگر تھانے میں درج کیا گیا جس میں قتل اور اقدام قتل کی دفعات شامل ہیں۔
