کراچی پولیس آفس پر جمعے کی شام ہونے والے حملے کا مقدمہ سی ٹی ڈی تھانے میں درج کرلیا گیا ہے جس میں کالعدم ٹی ٹی پی کے 3 ہلاک سمیت 5 دہشتگردوں کو نامزد کیا گیا ہے۔
اے آر وائی نیوز کے نمائندے آصف خان کے مطابق کراچی پولیس آفس پر جمعے کی شام ہونے والے حملے کا مقدمہ سی ٹی ڈی تھانے میں درج کرلیا گیا ہے۔ تھانہ صدر کے ایس ایچ او کی مدعیت میں درج مقدمے میں کالعدم ٹی ٹی پی کے 3 ہلاک سمیت 5 دہشتگردوں کو نامزد کیا گیا ہے اور اس میں قتل، اقدام قتل، دہشتگردی سمیت سنگین نوعیت کی دفعات شامل کی گئی ہیں۔
مدعی نے ایف آئی آر میں موقف اختیار کیا ہے کہ شام 7 بج کر 15 منٹ پر وائرلیس کے ذریعے حملے کی اطلاع ملی۔ 7 بج کر 20 منٹ پر جائے وقوعہ پر پہنچا اور نفری طلب کی۔ ڈی آئی جی جنوبی عرفان بلوچ کی سربراہی میں آپریشن ترتیب دیا گیا۔
مقدمے کی درج ایف آئی آر کے متن کے مطابق حملےمیں 3 دہشت گرد ملوث تھے۔ جوابی کارروائی میں ایک دہشت گرد نے تیسری منزل پر خود کو دھماکے سے اڑایا۔ دوسرا دہشت گرد چوتھی منزل اور تیسرا چھت پر مارا گیا۔ جوابی کارروائی میں ہلاک 2 دہشت گردوں نے خود کش جیکٹ پہنی ہوئی تھی۔ تیسرے دہشت گرد کے اعضا ملے۔
حملے میں رینجرز اور پولیس کے 4 افراد شہید جب کہ 18 افراد زخمی ہوئے۔ حملے کی ذمے داری کالعدم ٹی ٹی پی نے سوشل میڈیا کے ذریعے قبول کی۔
ایف آئی آر میں کہا گیا ہے کہ 3 دہشت گرد گاڑی میں سوار ہوکر صدر پولیس لائنز پہنچے تھے جب کہ کار سوار حملہ آوروں کے ساتھ مزید 2 دہشتگرد موٹر سائیکل پر آئے تھے۔ موٹر سائیکل سوار دہشتگردوں نے کراچی پولیس آفس کی نشاندہی کی جس کے بعد وہ دونوں دہشتگرد تینوں حملہ آوروں سے گلے مل کر فرار ہوگئے۔
یہ بھی پڑھیں: کراچی پولیس آفس حملہ: آپریشن مکمل، تمام دہشت گرد جہنم واصل
دہشتگرد فیملی کوارٹر کی عقبی دیوار پر لگے تار کو کاٹ کر داخل ہوئے۔ ہلاک دہشتگردوں سے 5 دستی بم اور دو خودکش جیکٹس برآمد ہوئی ہیں۔
ایف آئی آر میں کہا گیا ہے کہ صدر پولیس لائنز کے قریب کھڑی گاڑی کو تحویل میں لیے لیا گیا ہے۔
