کراچی : گلستان جوہر میں مولانا صوفی عبدالقیوم کے قتل کے واقعے کی سی سی ٹی وی فوٹیج سامنے آگئی ، ملزم نے مبینہ طور پر صوفی عبدالقیوم کو بیٹھنے کا کہا اور سر میں گولی مار دی۔
تفصیلات کے مطابق کراچی کے علاقے گلستان جوہر میں نامعلوم ملزمان کی جانب سے صوفی عبدالقیوم کی ٹارگٹ کلنگ کے واقعے کی سی سی ٹی وی فوٹیج سامنے آگئی۔
ویڈیو میں صوفی عبدالقیوم کو مسجد سے گھر جاتے دیکھا جا سکتا ہے، جس کے بعد سامنے سے موٹر سائیکل آئی تو مولانا رک گئے، موٹر سائیکل پر پیچھے سے مسلح موٹر سائیکل سوار ملزم اترا۔
ویڈیو میں دیکھا گیا کہ ملزم نے مبینہ طور پر صوفی عبدالقیوم کو بیٹھنے کا کہا، صوفی عبدالقیوم جیسے ہی بیٹھنے لگے ملزم نے سر کے عقبی حصے کو نشانہ بنایا اور فائرنگ کے بعد دونوں ملزمان گلی کی جانب فرار ہوگئے۔
یاد رہے آج صبح کراچی کے علاقے گلستان جوہر بلاک 9 میں نامعلوم ملزمان کی جانب سے فائرنگ کے نتیجے میں مولانا عبد القیوم صوفی جاں بحق ہوگئے تھے۔
پولیس نے بتایا تھا کہ مقتول مولانا عبدالقیوم صوفی نماز پڑھا کر واپس گھر آرہے تھے کہ انہیں نشانہ بنایا گیا، موٹر سائیکل سوار 2ملزمان نے مقتول کو نشانہ بنایا، مقتول کے سر پر ایک گولی لگی جو جان لیوا ثابت ہوئی۔