اسلام آباد : چیئرمین پی ٹی آئی نے آفیشل سیکرٹ ایکٹ اورآرمی ترمیمی قانون کیخلاف سپریم کورٹ سے رجوع کرلیا، جس میں ترمیمی قانون کو کالعدم قرار دینے کی استدعا کی ہے۔
تفصیلات کے مطابق چیئرمین پی ٹی آئی نے آفیشل سیکرٹ ایکٹ اورآرمی ترمیمی قانون کیخلاف سپریم کورٹ میں آئینی درخواست دائر کردی۔
سپریم کورٹ میں درخواست شعیب شاہین کی وساطت سے دائر کی گئی، درخواست میں کہا گیا کہ آرمی ترمیمی ایکٹ اورآفیشل سیکرٹ ایکٹ پرصدرمملکت نے دستخط نہیں کیے، آرمی ترمیمی ایکٹ اورآفیشل سیکرٹ ایکٹ آرٹیکل 10اے،8اور19 کےمنافی ہے۔
درخواست میں صدر، سیکرٹری قومی اسمبلی، وزارت قانون اور داخلہ کو فریق بنایا گیا اور آفیشل سیکرٹ ایکٹ اور آرمی ترمیمی قانون کو کالعدم قرار دینے کی استدعا کرتے ہوئے کہا کہ آئینی درخواست کے فیصلہ تک دونوں قوانین کو معطل کیا جائے۔
یاد رہے سندھ بارکونسل نے بھی آرمی ایکٹ اور آفیشل سیکرٹ ایکٹ کو سپریم کورٹ میں چیلنج کیا تھا، سندھ بارکونسل نے سپریم کورٹ میں دائر خواست میں مؤقف اختیار کیا تھا کہ دونوں قوانین پر صدر نےدستخط نہیں کیے لہذٰا قوانین غیرآئینی قرار دیئےجائیں۔
درخواست میں کہا گیا تھا کہ آفیشل سکریٹ ایکٹ اور آرمی ترمیمی ایکٹ بنیادی انسانی حقوق سےمتصادم ہیں دونوں ایکٹ پرصدر کے دستخط نہ کرنےکی بنیاد پر کالعدم قرار دیا جائے۔
خیال رہے صدر مملکت ڈاکٹر عارف علوی نے سماجی رابطوں کی ویب سائٹ ٹوئٹر پر واضح تردیدی بیان جاری کرتے ہوئے کہا تھا کہ انہوں نے آفیشل سیکرٹ ایکٹ اور آرمی ایکٹ ترمیمی بل پر دستخط نہیں کیے۔
