بشکک: کرغیزستان کے دارالحکومت میں چینی سفارتخانے پر خودکش حملہ کار بم حملے کے نتیجے میں تین محافظ زخمی ہوگئے۔
غیرملکی خبررساں ادارے کے مطابق کرغیز دارالحکومت بشکک میں خود کش حملہ آور نے بارود سے بھری گاڑی چینی سفارتخانے کے گیٹ سے ٹکرادی، حکام کے مطابق گاڑی دروازے کو توڑتی ہوئی اندر داخل ہوگئی اور چینی سفیر کی رہائش گاہ کے قریب دھماکے سے پھٹ گئی۔
حملے میں سفارتخانے کے تین محافظ زخمی ہوگئے جبکہ تینوں زخمی کرغیزستانی شہری ہیں۔
کرغیزستان کی سرکاری سیکیورٹی سروس کا کہنا ہے کہ کار بم دھماکے میں چوبیس کلو گرام بارود استعمال کیا گیا ، واقعے کی تحقیقات کی جا رہی ہیں جبکہ دھماکے کے نتیجے میں چینی سفارتخانے میں کام کرنے والے دو مقامی افراد اور ایک خاتون معمولی بھی زخمی ہوئے ہیں۔
حکام کے مطابق گاڑی میں چوبیس کلو دھماکہ خیز مواد موجود تھا۔
واضح رہے کہ چینی سفارتخانہ سابق سوویت ریاست کرغیزستان کے دارالحکومت بشکیک کے جنوب میں واقع ہے۔
