لباس ہماری شخصیت کا آئینہ دار ہوتا ہے، مشہور کہاوت ہے کہ کھاؤ من بھاتا، پہنو جگ بھاتا، کیونکہ کسی کا لباس دیکھ کر اور گفتگو سن کر ہی سامنے والے کی شخصیت کے بارے میں کوئی رائے قائم کی جاسکتی ہے۔
جس طرح ہر موسم کے اعتبار سے کھانے پینے کا اہتمام کیاجاتا ہے اسی طرح لباس کے معاملے میں بھی بہت خیال رکھنا چاہیے اس سے ہماری شخصیت کے مختلف پہلو اجاگر ہوتے ہیں۔
اس حوالے سے اے آر وائی نیوز کے پروگرام باخبر سویرا میں فیشن ڈیزائنر ثناء وامق نے ناظرین کو لباس کے انتخاب سے متعلق اہم مشورے دیئے۔
انہوں نے کہا کہ کپڑے خریدتے ہوئے آپ کو یہ لازمی معلوم ہونا چاہیے کہ کون سا رنگ اور کون سا ڈیزائن آپ کی شخصیت کے مطابق ہے یا آپ پر اچھا لگے گا۔
سردیوں میں لباس پہنے کے حوالےسے ثناء وامق کا کہنا تھا کہ ویسے تو کراچی میں زیادہ سردی نہیں پڑتی اسی لیے یہاں موٹی موٹی جیکٹس تو نہیں پہنی جاسکتیں لیکن ایسا لباس پہنیں کہ سردی کا پہناوا لگے جو دیکھنے والوں کو بھی بھاتا ہے۔
ان کا مزید کہنا تھا کہ سردیوں میں مخمل (ویلویٹ) کے کپڑے پہننا کافی بہتر ہے اس میں مختلف کوالٹیز ہوتی ہیں اس کے علاوہ کوٹرائے، لیلن اور کھدر بھی بہترین انتخاب ہے۔
رنگوں کے حوالے سے ثناء وامق نے کہا کہ سردیوں میں گہرے رنگ کے ملبوسات کا استعمال کرنا چاہیے جس میں بوتل گرین، میرون اور ریڈ کی ٹون میں جو شیڈز دستیاب ہوں وہی استعمال کریں۔
