بھارت میں سفاک شوہر کے ہاتھوں بیوی کے ہولناک قتل کی واردات سامنے آئی ہے، ملزم نے اہلیہ کو قتل کرکے اس کی لاش ٹکڑے کرکے پانی کی ٹینکی میں ڈال دی، پولیس جعلی کرنسی کی تحقیقات کرتے ہوئے لاش تک پہنچی۔
تفصیلات کے مطابق بھارتی ریاست چھتیس گڑھ کے بلاس پور میں گزشتہ روز ایک شخص کو بیوی کو قتل کرنے اور اس کی لاش کو کٹر مشین سے چھ ٹکڑے کرنے کے بعد پانی کی ٹینکی میں چھپانے کے الزام میں گرفتار کیا گیا ہے۔
قتل کی اس واردات کا انکشاف پولیس کو اس وقت ہوا جب وہ جعلی کرنسی چھاپنے کے ایک مقدمے میں اس گھر کی تلاشی لینے پہنچی، جہاں اہلکاروں لاش سے اٹھنے والے تعفن کی بدبو آنے لگی۔
انہوں نے گھر کی تلاشی لی تو اس دوران انہیں پانی کی ایک ٹینکی نظر آئی جہاں سے ناقابل برداشت بدبو آرہی تھی۔ وہ یہ دیکھ کر حیران رہ گئے کہ ٹینکی کے اندر ایک عورت کی لاش چھ ٹکڑوں میں کٹی ہوئی پڑی تھی۔
بھارتی میڈیا رپورٹس میں بتایا گیا ہے کہ ملزم جس کی شناخت 32 سالہ پون ٹھاکر کے نام سے کی گئی ہے، اس نے اپنی 23 سالہ بیوی ستی ساہو کا گلہ گھونٹنے کے بعد اس کے جسم کو الیکٹرک کٹر سے کاٹ کر ٹینکی میں ڈال دیا تھا۔
ابتدائی تحقیقات کے بعد پولیس حکام کا کہنا ہے کہ ملزم پون ٹھاکر نے اپنی بیوی کو بے وفائی کے شبہ میں قتل کیا ہے، پولیس کے مطابق مقتولہ کی لاش کی باقیات ایک سے دو ماہ پرانی ہوسکتی ہیں، ملزم نے بیوی کو قتل کرنے کے بعد اس کی لاش کے ٹکڑے جلانے کی بھی کوشش کی لیکن ناکام رہا۔
پولیس کے مطابق ملزم نے لاش کے ٹکڑوں کو ٹیپ سے لپیٹ کر ٹینکی کے اندر ڈالنے سے پہلے پولی تھین میں پیک کیا تھا۔ ملزم نے یہ بھی دعویٰ کیا ہے کہ اس کی بیوی اس کے جعلی کرنسی چھاپنے کے کام میں مداخلت کر رہی تھی۔
پولیس نے بتایا کہ چھاپہ کے دوران ملزم کے گھر سے ایک کلر پرنٹر، فوٹو کاپی شدہ کاغذات اور 500اور 200 روپے کے جعلی نوٹ کچھ اصلی کرنسی برآمد کی ہے۔ ملزم نے جعلی نوٹ چھاپنے کے لیے فوٹو گرافی کی مہارت حاصل کی ہے وہ بنگلورو سے خصوصی کاغذ منگواتا تھا۔
بلاس پور پولیس نے ملزم کے خلاف قتل اور جعلی کرنسی کا مقدمہ درج کرکے گرفتار کرلیا ہے مزید انکشافات بھی متوقع ہیں۔
