کراچی کے شیر شاہ پراچہ چوک کے بینک سے رقم لے کر نکلنے والے شہریوں کو ڈاکوؤں نے لوٹ کر لاکھوں روپے نقدی سے محروم کردیا۔
اے آر وائی نیوز کے مطابق ملزمان شہری سے ڈیڑھ لاکھ روپے لوٹ کر فرار ہوئے، واردات کی سی سی ٹی وی فوٹیج اے آر وائی نیوز نے حاصل کرلی۔
فوٹیج میں دیکھا جا سکتا ہے کہ دو موٹر سائیکل سوار ملزمان نے بینک سے رقم لے کر نکلنے والے شہریوں کا پیچھا کیا اور انہیں پراچہ چوک کے قریب روک لیا۔
اس دوران موٹر سائیکل پر پیچھے بیٹھا شہری خوفزدہ ہوکر گاڑی سے اتر کر واپس بھاگا، متاثرہ شہری کے مطابق اس نے شیر شاہ پولیس کو واردات کی اطلاع دے دی ہے۔
متاثرہ شہری کا کہنا ہے کہ اسی مقام پر وارداتیں ہونا روز کا معمول بن چکا ہے، پولیس کو گشت بڑھانے کا کہتے ہیں تو وہ کہتی ہے موبائل میں ڈیزل نہیں ہے۔
واضح رہے کہ کراچی میں لاقانونیت میں اضافہ ہوگیا، حکومت سندھ اور پولیس حکام کے دعوؤں کے باوجود کراچی میں لٹیرے آزادانہ وارداتیں کرتے پھر رہے ہیں اور انہیں کوئی پوچھنے والا نہیں ہے، آج صبح سویرے اے آر وائی نیوز کی وین کو اورنگی سائیٹ ہیڈ آفس کے قریب لوٹ لیا گیا۔
یہ بھی پڑھیں: صبح سویرے اے آر وائی نیوز کی وین کو لوٹ لیا گیا
وین ڈرائیور کے مطابق ملزمان 2 موٹر سائیکلوں پر سوار تھے اور انہوں نے بلا خوف وخطر ناکا لگا کر واردات کی، 5 ڈاکو وین میں خواتین عملے سے بیگز، نقدی اور موبائل فون چھین کر با آسانی فرار ہونے میں کامیاب ہوگئے۔
