وزیر اعلیٰ پنجاب مریم نواز کے وردی پہننے پر ترجمان پنجاب پولیس کا مؤقف سامنے آگیا۔
سماجی رابطے کی ویب سائٹ ایکس (ٹوئٹر) پر ترجمان پنجاب پولیس نے لکھا کہ پولیس ڈریس ریگولیشنز کے مطابق وزیر اعلیٰ پنجاب مریم نواز پولیس وردی پہننے کی حقدار ہیں۔
ترجمان پنجاب پولیس کا کہنا ہے کہ سینٹرل پولیس آفس کو سیکڑوں پیغامات موصول ہوئے جس میں پولیس اہلکاروں نے اس اقدام کو سراہا۔
ٹوئٹ میں لکھا گیا کہ خواتین پولیس افسران تقریب کا جشن منارہی ہیں اور انہوں نے یونیفارم میں وزیر اعلیٰ پنجاب کی مختلف تصاویر شیئر کی ہیں۔
ترجمان کا کہنا ہے کہ پنجاب پولیس امن و امان کی صورتحال مزید بہتر بنانے اور ملک بھر میں انسداد دہشت گردی کی کوششیں جاری رکھنے کے لیے پرعزم ہے۔
واضح رہے کہ اس سے قبل وزیر اعلیٰ مریم نواز کے پولیس یونیفارم پہننے پر عدالت میں شہری نے مقدمہ درج کرنے کا حکم دینے کی استدعا کی تھی۔
آفتاب باجوہ ایڈووکیٹ کے توسط سے دائر درخواست میں مؤقف اختیار کیا گیا تھا کہ قانون کے تحت کوئی بھی شخص کسی ادارے کی وردی نہیں پہن سکتا۔ مقدمہ درج کرنے کے لیے تھانے میں درخواست دی لیکن کارروائی نہیں ہوئی، استدعا ہے کہ مریم نواز کے خلاف مقدمہ درج کرنے کا حکم دیا جائے۔
یاد رہے کہ لاہور میں وزیرِ اعلیٰ پنجاب مریم نواز نے پولیس ٹریننگ کالج چوہنگ کی پاسنگ آؤٹ پریڈ سے خطاب کرتے ہوئے کہا تھا کہ آپ سب کی ذمہ داری ہے مظلوم کی داد رسی کریں اور ظالم کو انجام تک پہنچائیں۔
ان کا کہنا تھا کہ وزیرِاعلیٰ کی کرسی پربیٹھ کر کسی کے خلاف فیصلہ کرنا ہو تو دل پرپتھررکھ کر کرتی ہوں میرے دل میں انتقام کا جذبہ نہیں، لیکن مجھے انصاف کرنا ہے۔
