لاہور : وزیراعلیٰ پنجاب محمد شہبازشریف نے کہا ہے کہ جلد الیکشن کی باتیں وہ لوگ کررہے ہیں جو ہماری ترقی نہیں دیکھ سکتے، آصف زرداری احتساب پر بھاشن دیں یہ خدا کی قدرت ہے۔
ان خیالات کا اظہار انہوں نے لاہور میں پاکستان کڈنی اینڈ لیور ٹرانسپلانٹ انسٹی ٹیوٹ منصوبے کے دورے کے موقع پر میڈیا سے گفتگو کرتے ہوئے کیا۔
وزیر اعلیٰ پنجاب کا کہنا تھا کہ جلد الیکشن کی باتیں وہ لوگ کررہے ہیں جنہوں نے دھرنوں میں قوم کا وقت ضائع کیا۔ نیازی صاحب کرپشن کا الزام لگانے کے بعد مقدمات کا سامنا کرنے کی بجائے بھاگ رہے ہیں۔
شہبازشریف نے سابق صدر آصف علی زرداری کو تنقید کانشانہ بناتے ہوئے کہا کہ غریب عوام کے چھ ارب روپے ہڑپ کرنے والے آج انصاف کا بھاشن دے رہے ہیں، صاف دکھائی دے رہا ہے کہ احتساب صرف شریف خاندان کا ہی ہورہا ہے۔
مزید پڑھیں: صوبے کے عوام اپنی جان سے زیادہ عزیز ہیں، شہباز شریف
شہبازشریف کا مزید کہنا تھاکہ سموگ بین الاقوامی مسئلہ ہے جس پر قابو پانے کے لئے کوششیں کی جا رہی ہیں، انہوں نے بتایا کہ 114 بیڈز پر مشتمل پاکستان کڈنی اینڈ لیور ٹرانسپلانٹ انسٹیوٹ کے پہلے فیز کا افتتاح 25 دسمبر کو کیا جائے گا۔
