راولپنڈی : آرمی چیف جنرل عاصم منیر کی جانب سے گولڈ میڈلسٹ ارشد ندیم کےاعزازمیں خصوصی تقریب آج ہوگی۔
تفصیلات کے مطابق آرمی چیف جنرل عاصم منیر کی جانب سے گولڈ میڈلسٹ ارشد ندیم کے اعزاز میں خصوصی تقریب آج جنرل ہیڈ کوارٹرز راولپنڈی میں ہوگی۔
گولڈ میڈلسٹ اہلخانہ کے ہمراہ تقریب میں شرکت کریں گے، تقریب کے انعقاد کامقصدگولڈ میڈلسٹ کی صلاحیتوں کااعتراف اور حوصلہ افزائی ہے۔
گولڈ میڈلسٹ قوم کی توقعات پر پورا اترے اور ملک کا نام روشن کیا اور کھیلوں کی دنیا میں پاکستان کی نوجوان نسل کے لئے مشعل راہ ثابت ہوں گے۔
یاد رہے 13 اگست کو وزیر اعظم ہاؤس میں گولڈ میڈلسٹ اور اہل خانہ کے اعزاز میں استقبالیہ تقریب ہوئی تھی ، جس میں وزیر اعظم شہباز شریف نے پیرس اولمپکس 2024 میں پاکستان کیلیے گولڈ میڈل جیتنے والے ایتلھیٹ کیلیے 15 کروڑ روپے انعام اور ہائی پرفارمنس اکیڈمی کے قیام کا اعلان کیا تھا۔
اس موقع پر قومی ایتھلیٹ کا کہنا تھا کہ وزیر اعظم شہبازشریف اور قوم کا شکریہ ادا کرتا ہوں جنہوں نے مجھے عزت دی کیونکہ کھلاڑی کو عزت ملے تو حوصلہ بڑھتا ہے، میرے کوچ اور ڈاکٹر سمیت سب نے محنت کی، ہم نے میڈل جیتنے کیلیے بہت محنت کی۔
