ممبئی: بالی وڈ کی معروف اداکارہ کنگنا رناوت کی نئی ریلیز ہونے والی فلم ”دھاکڑ“ بُری طرح فلاپ ہوگئی ہے۔
بھارتی میڈیا کے مطابق کنگنا رناوت کی ایکشن اور تھرلر سے بھرپور فلم ”دھاکڑ“ کو سنیما گھروں میں ریلیز ہوئے آج ایک ہفتہ مکمل ہوگیا تاہم وہ لوگوں نے اس میں کوئی دلچسپی ظاہر نہیں کی۔
مزید پڑھیں: بالی وڈ میں کوئی اس لائق نہیں جسے گھر بلا کر کھانا کھلاؤں: کنگنا رناوت
کنگنا رناوت نے ”دھاکڑ“ کی بھرپور تشہیر کی۔ فلمسازوں کو امید تھی کہ فلم باکس آفس پر سپر ہٹ ثابت ہوگی لیکن ”دھاکڑ“ دیکھنے والوں کو اپنی جانب متوجہ نہ کر سکی۔
ایک اندازے کے مطابق ”دھاکڑ“ ایک ہفتے میں محض 4 ہزار 420 روپے کا بزنس کیا۔ کچھ سنیما گھروں نے فلم کی نمائش بند کر دی ہے۔
فلم بنانے والوں نے بہتر ڈیل کے لیے اسے او ٹی ٹی اور سیٹلائٹ پر ریلیز کرنے کا فیصلہ کیا ہے لیکن باکس آفس پر مایوس کن پرفارمنس کے بعد اب اس کا امکان نظر نہیں اور فلمسازوں کو بھاری نقصان اٹھانا پڑے گا۔
کنگنا رناوت کو ہمیشہ سے یہی گلا رہا ہے کہ فلم نگری میں ان کا کوئی دوست نہیں ہے۔ معروف اداکار سلمان خان نے کنگنا کی نئی فلم ”دھاکڑ“ کا ٹریلر انسٹا گرام پر شیئر کیا تھا اور اداکارہ کے لیے نیک خواہشات کا اظہار کیا تھا۔
اداکارہ نے ردعمل میں سلو میاں کا شکریہ ادا کیا اور انہیں ”سونے کے دل والا ہیرو“ کہا تھا۔