لاہور: احتساب عدالت نے چوہدری برادران کے خلاف دو انکوائریاں بند کرنےکی اجازت دے دی ہے۔
تفصیلات کے مطابق احتساب عدالت نے لاہور نے چوہدری برادران کےخلاف دو انکوائریاں بند کرنےکی اجازت دے دی ہے، جو انکوائریز بند کرنے کی درخواست منظور کی گئی ہیں ان کا تعلق زائد اثاثہ جات کیس سے تھا۔
احتساب عدالت کے ایڈمن جج شیخ سجاد احمد نے نیب کی انکوائری بند کرنے کی درخواست پر سماعت کی، نیب نے چوہدری پرویز الہیٰ، چوہدری شجاعت حسین اور مونس الہیٰ سمیت دیگر فیملی ارکان کے خلاف آمدن سے زائد اثاثہ جات انکوائری بند کرنے کے لیے عدالت سے رجوع کیا تھا۔
درخواست میں نیب لاہور نے موقف اختیار کیا کہ انکوئری میں چوہدری برادران کے خلاف ٹھوس شواہد اور ثبوت نہیں ملے، چوہدری برادران کی فیملی کے اثاثے قانون کے مطابق ہیں اور ان میں کوئی غیر قانونی اقدام نہیں پایا گیا۔
نیب نے کہا کہ نیب لاہور کو تحقیقات میں تمام چیزیں قانون کے مطابق ملی ہیں، لہذا عدالت چوہدر برادران کے خلاف نیب لاہور میں جاری انکوائری کو بند کرنے کا حکم دے،عدالت میں نیب لاہور کی جانب سے پراسکیوٹر اسد اللہ نے دلائل دیئے اور انکوائری کو فوری بند کرنے کی منظوری مانگی جس پر عدالت نے کارروائی کرتے ہوئے نیب لاہور کی استدعا منظور کرلی۔
یاد رہے کہ نیب لاہور اس سے قبل چوہدری برادران کے خلاف غیر قانونی بھرتیوں اور بینک نادہندگی کی تحقیقات بھی بند کر چکا ہے۔
