کراچی: محکمہ انسداد دہشت گردی (سی ٹی ڈی) نے بین الصوبائی نان کسٹم پیڈ گاڑیوں کی اسمگلنگ میں ملوث 3 رکنی گروہ کو گرفتار کرلیا۔
تفصیلات کے مطابق محکمہ انسداد دہشت گردی (سی ٹی ڈی) نے وفاقی حساس ادارے کے ہمراہ حب ریور روڈ پر کارروائی کرتے ہوئے بین الصوبائی نان کسٹم پیڈ گاڑیوں کی اسمگلنگ میں ملوث 3 رکنی گروہ کو گرفتار کرلیا۔
ترجمان سی ٹی ڈی کے مطابق گرفتار ملزمان میں میر عبد الصادق مینگل، حکمت اللہ اور عبد الحمید شامل ہے، گرفتار ملزمان کا تعلق قلات بلوچستان سے ہے،جس سے کلاشنکوف، نائن ایم ایم پستول اور 30 بور پستول برآمد ہوا ہے۔
ترجمان نے بتایا کہ مشترکہ ٹیم نے دہشت گردوں کی تلاش میں سعید آباد کے قریب گاڑی کو روکا، مشتبہ گاڑی میں 3 مسلح افراد حب بلوچستان سے کراچی آرہے تھے۔
ترجمان سی ٹی ڈی کا کہنا ہے کہ ملزمان نے دوران تفتیش اہم انکشافات کئے ہیں، ملزمان کا تعلق بین الصوبائی نان کسٹم پیڈ گاڑیوں کےگروہ سے ہے، ملزمان بلوچستان سے سندھ، پنجاب اور کے پی لاتعداد گاڑیاں منتقل کر چکے ہیں۔
ترجمان نے مزید بتایا کہ ملزمان ایک گاڑی کو دوسرے صوبے منتقل کرنے کے ڈیڑھ لاکھ روپے لیتے تھے، ملزمان سے برآمد گاڑی کو قبضے میں لیکر معلومات حاصل کی جارہی ہیں۔
