ہریانہ: بھارتی ریاست ہریانہ میں ہندو تنظیموں میں خوں ریز تصادم کے نتیجے میں دفعہ 144 نافذ کر دی گئی، اور انٹرنیٹ بند کر دیا گیا ہے۔
تفصیلات کے مطابق مودی سرکار نے ریاست ہریانہ میں دفعہ 144 نافذ کر دی، ہریانہ کے ضلع نوح میں انتہا پسند ہندو گروپوں میں گزشتہ روز شدید تصادم ہوا تھا، جس میں 2 پولیس اہل کار ہلاک جب کہ 70 سے زائد لوگ زخمی ہو گئے تھے۔
تصادم وشوا ہندو پرشاد اور بجرنگ دل تنظیموں کے درمیان برج منڈل شوبھا یاترا کے دوران پیش آیا، مشتعل انتہا پسندوں نے درجنوں گاڑیوں کو نذر آتش کر ڈالا، جس کے بعد سرکار حرکت میں آئی اور ریاست میں اگلے تین روز کے لیے انٹرنیٹ، ٹیلی فون اور میڈیا سروسز معطل کر دیں۔
دوسری ریاستوں سے بھی ہزاروں کی تعداد میں پولیس اہلکار بذریعہ ہیلی کاپٹر ہریانہ کی طرف روانہ کیے گئے، پولیس کی طرف سے مشتعل مظاہرین پر آنسو گیس کی شدید شیلنگ کی گئی۔
دیگر انتہا پسند ہندو تنظیموں نے واقعے کو ہندو مسلم تصادم کا رنگ دے کر ملبہ مسلمانوں پر ڈالنا شروع کر دیا ہے، ٹوئٹر پر ہندو انڈر اٹیک اور بائیکاٹ مسلم کے ٹرینڈ بنانے لگ گئے ہیں، تجزیہ نگاروں کا کہنا ہے کہ تصادم کو ہندو مسلم فساد کا رنگ دینا بی جے پی اور مودی کی 2024 کے انتخابات پر اثر انداز ہونے کی کوشش ہو سکتی ہے۔
