کراچی : سمندری طوفان بائپر جوائے کے پیش نظر شہریوں کو سی ویو جانے سے روکنے کے لیے پولیس نے کلفٹن سے ساحل تک جانے والی تمام سڑکیں بند کردیں۔
تفصیلات کے مطابق بحیرہ عرب میں سمندری طوفان بائپر جوائے کے باعث الرٹ جاری ہونے کے بعد پولیس بھی حرکت میں آگئی اور سی ویو جانے والی تمام سڑکیں بند کر کے پولیس نفری تعینات کردی گئی۔
پولیس نے شہریوں کو روکنے کے لیے کلفٹن سے ساحل تک جانے والی تمام سڑکیں رکاوٹیں لگا کر بند کردیں اور سی ویو کے اطراف رہائشیوں کو سروس روڈ استعمال کرنے کی ہدایت کی ہے۔
پولیس کی جانب سے خیابان اتحاد سے آنیوالا ٹریفک خیابان صبا کی جانب موڑا جا رہا ہے۔
یاد رہے سمندری طوفان کے خطرے کے پیشِ نظر کمشنرکراچی نے دفعہ ایک سوچوالیس نافذ کرکےسمندر میں نہانے،کشتی رانی اورماہی گیری پرمکمل پابندی عائد کی ہوئی ہے۔
گذشتہ روز کراچی میں سمندری طوفان کے خطرے پیش نظر لگائی جانے والی دفعہ 144 شہریوں نے ہوا میں اڑا دی تھی اور چھٹی والے دن عوام کی بڑی تعداد سی ویو پر موجود رہی، شہریوں کا کہنا تھا کہ گرمی ہمیں یہاں کھیچ لائی، گھر میں بجلی آتی ہے نہ ہی پانی موجود ہے۔
خیال رہے سمندری طوفان بپرجوئے کی شدت مزید بڑھ گئی ہے اور کراچی سے فاصلہ چھ سو کلومیٹررہ گیا، سسٹم کے اطراف ہواؤں کی رفتار ایک سو اسی سے دو سو بیس کلومیٹر فی گھنٹہ اور لہروں کی بَلندی پینتیس سے چالیس فٹ تک پہنچ گئی ہے۔
محکمہ موسمیات کا کہنا ہے کہ طوفان جمعرات کو کیٹی بندر اور بھارتی گجرات کے درمیان کسی مقام پر ٹکرائے گا جبکہ دو سے تین دن میں کراچی، حیدرآباد، ٹھٹہ اور دیگر شہروں میں طوفانی بارش ہوسکتی ہیں۔
