کراچی: ساحل پر پھنسے بحری جہاز کی واپسی کا فیصلہ 24 گھنٹوں میں متوقع ہے ، جہاز کے سی وردی ہونے کا فیصلہ رپورٹ سے واضح ہوگا ،سی وردی نہ ہونے کی صورت میں جہاز کو ٹو کرکے گلف لے جایا جائے گا۔
تفصیلات کے مطابق کراچی کے ساحل پر پھنسے بحری جہاز کی واپسی کیلیے میرین مرکینٹائل ڈپارٹمنٹ کی ٹیم نے متاثرہ جہاز کا سروے کیا ، 2 رکنی ٹیم اپنی رپورٹ 24 گھنٹے میں پیش کرے گی۔
کے پی ٹی ذرائع کا کہنا تھا کہ جہاز کی واپسی کے حوالے سے رپورٹ اہم ہوگی ، جہاز کے سی وردی ہونے کا فیصلہ رپورٹ سے واضح ہوگا ، سی وردی نہ ہونے کی صورت میں جہاز کو ٹو کرکے گلف لے جایا جائے گا۔
ذرائع نے کہا کہ جہاز کے سی وردی ہونے یہ نہ ہونے کا فیصلہ 24 سے 48 گھنٹوں میں ہوجائے گا، جہاز اس وقت کے پی ٹی کی تحویل میں ہے، جہاز کے مالک واجبات ادا کرکے ہی جہاز لے جاسکتا ہے۔
جہاز پر موجود کارگو گلف پہنچانے کے بعد دوبارہ متعلقہ مقام پربھیجا جائے گا۔
یاد رہے تین روز قبل انتظامیہ 7 ہفتوں بعد کراچی کے ساحل پر پھنسے جہاز ہینگ ٹونگ 77 کو نکالنے میں کامیاب ہوئی تھی ، جہاز کوساحل سے 5میل سے زائد سمندرمیں گھسیٹا گیا تھا۔
خیال رہے گزشتہ ماہ ناقص پلاننگ ،پرانے رسوں اور ناتجربہ کار ٹیم کی وجہ سے جہاز کھنچنے کی متعدد کوشیشیں ناکام ہو چکی ہیں ، جس کے بعد وزارت بحری امور اور کراچی پورٹ ٹرسٹ جہاز کھینچنے میں ناکامی پر تحقیقات کا حکم دیا تھا۔
بعد ازاں کے پی ٹی نے جہازمالک کو جہاز نکالنے کے مکمل پلان ،آلات،بارج ،ٹگس سمیت سالویج ماسٹر کی تفصیلات جمع کرانے کی ہدایت کی تھی۔
