The news is by your side.

Advertisement

دپیکا اپنی مہندی پر پاکستانی کلام سُن کر جھوم اٹھیں

نوبیاہتا جوڑے نے گزشتہ روز بنگلور میں استقبالیہ تقریب کا اہتمام کیا تھا

اٹلی: بالی ووڈ کی معروف اداکارہ دپیکا پڈوکون کی شادی کے بعد وطن واپس لوٹ گئے، نوبیاہتا جوڑے نے شیڈول کے مطابق گزشتہ روز بنگلور میں ساتھی فنکاروں اور دیگر رشتے داروں کے لیے استقبالیے کا اہتمام کیا۔

بالی ووڈ کی معروف جوڑی دپیکا اور رنویر اٹلی کے خوبصورت مقام لیک کومو پر ازدواجی بندھن میں بندھ کر اتوار کی صبح واپس بھارت پہنچے، دونوں نے شیڈول کے مطابق پہلی استقبالیہ تقریب کا اہتمام بنگلور میں کیا جس میں دلہن نے سنہرے رنگ کی ساڑھی زیب تن کی تھی۔

بھارتی میڈیا کی رپورٹس کے مطابق بنگلور میں ہونے والی تقریب کا اہتمام دپیکا اور اُن کے اہل خانہ کی طرف سے کیا گیا تھا، اداکارہ نے جو ساڑھی زیب تن کی وہ انہیں والدہ نے تحفے میں دی جبکہ رنویر نے بھی سسرال والوں کی طرف سے دی جانے والی شیروانی پہنی۔

دونوں نے اٹلی اور بنگلور میں ہونے والی تقریبات میں مشہور ڈیزائنر سبیاسچی کے تیار  کردہ لباس زیب تن کیے۔

مزید پڑھیں: شادی کے ریسیپشن پر دپیکا کی سنہری ساڑھی نے سب کا دل جیت لیا

دوسری استقبالیہ تقریب 28 نومبر کو ممبئی میں منعقد کی جائے گی جس کی میزبانی رنویر اور اہل خانہ کریں گے، استقبالیہ میں بالی ووڈ انڈسٹری کی شخصیات اور دیگر رشتے دار شرکت کریں گے۔

دپیکا پڈوکون اور رنویر کی اٹلی میں ہونے والی شادی سے ایک روز قبل یعنی 13 نومبر کو ڈھولکی بھی ہوئی جس میں بھارتی گلوکار ہرشدیپ کور نے لائیو پرفارم کیا تھا، اداکارہ کی ایک تصویر سوشل میڈیا پر وائرل ہوئی جس کے بارے میں ہر کوئی جاننے کا خواہش مند تھا کیونکہ دپیکا اس میں دونوں ہاتھ اوپر کر کے رقص کرتی نظر آرہی ہیں۔

بھارتی میڈیا رپورٹ کے مطابق دپیکا کی مذکورہ تصویر اٹلی میں ہونے والی مہندی کی تقریب کی ہے، جس میں جب گلوکار نے صوفیانہ کلام ’دما دم مست قلندر‘ گایا تو دلہن اپنے جذبات قابو میں نہ رکھ سکیں اور مہمانوں کے ساتھ مل کر رقص شروع کردیا۔

یہ بھی پڑھیں: بالی ووڈ‌ اداکار رنویر سنگھ دھمال پر جھوم اٹھے، ویڈیو وائرل

یاد رہے کہ 9 مئی کو بالی ووڈ اداکارہ سونم کپور  نے شادی کے حوالے سے ممبئی میں تقریب کا انعقاد کیا تھا جس میں رنویر سنگھ نے ’دما دم مست قلندر‘ پر خوب دھمال ڈالی تھی، اداکار کی ویڈیو سوشل میڈیا پر وائرل ہوگئی تھی۔

واضح رہے کہ بالی ووڈ جوڑی نے اپنی شادی کے لیے اٹلی کے خوبصورت مقام لیک کومو کا انتخاب کیا تھا جہاں 14 اور 15 تاریخ کو دو علیحدہ علیحدہ مذہبی رسومات کے تحت شادی کی تقریبات کا انعقاد کیا گیا۔ پہلے روز تقریب کی میزبانی لڑکی والوں نے جب کہ دوسرے دن رنویر کے اہل خانہ نے کی۔

چودہ نومبر کو شادی کی تقریب جنوبی بھارتی (ہندو مذہب) رسم و  روایات کی طرز پر منعقد کی گئیں جس میں دپیکا نے نارنجی مائل عروسی ساڑھی اور رنویر نے بھی دلہے کا ثقافتی لباس ’دھوتی کرتا’ زیب تن کیا تھا۔

شادی کے دوسرے روز کی تقریبات سندھی روایات کے مطابق انجام دی گئیں، جس میں دپیکا نے سرخ لہنگا زیب تن کیا اور وہ روایتی دلہن بھی بنیں جبکہ رنویر نے اسی کے ملتے جلتے رنگ کا کلاہ پہنا تھا۔

دونوں اداروں کے اہل خانہ نے قبل از وقت شادی کی تصویر سامنے نہ لانے کا فیصلہ کیا تھا جس کے لیے ہوٹل انتظامیہ سے سخت اقدامات کرنے کی استدعا بھی کی تھی۔

اسے بھی پڑھیں: دپیکا اور رنویر کی شادی کے بعد بھارت واپسی، شاندار استقبال

شادی میں شرکت کرنے والے مہمانوں کے پنڈال میں داخل ہونے سے قبل موبائل کیمرے ناکارہ بنا دیے گئے تھے جبکہ تصویر یا ویڈیو کو روکنے کے لیے فضا میں اڑنے والے ڈرونز کی بھی اطراف میں پابندی عائد کی گئی تھی۔

سیکیورٹی کے سخت اقدامات کے باوجود پہلے روز سے ہی تصاویر اور ویڈیوز سامنے آنا شروع ہوگئی تھیں، بعد ازاں دپیکاپڈوکون اور رنویر سنگھ نے اپنی شادی کی تصدیق کرتے ہوئے خود ہی تصاویر سماجی رابطے کی ویب سائٹ پر شیئر کردی تھیں۔

نوبیاہتا جوڑے کی بھارت واپسی                                                                                      

بالی ووڈ کا نوبیاہتا جوڑا اتوار 11 نومبر کی علی الصبح ممبئی ائیرپورٹ پہنچا تو وہاں پہلے سے ہی سیکیورٹی کے سخت انتظامات کیے گئے تھے، دونوں اداکاروں کو سیکیورٹی حصار میں ہی ائیرپورٹ سے گھروں کی جانب روانہ کیا گیا۔

دونوں اداکاروں نے وطن واپسی کا کوئی باضابطہ اعلان نہیں کیا تھا مگر اُس کے باوجود جیسے ہی بھارتی میڈیا نے رات گئے واپسی کی خبر نشر کی تو ممبئی ائیرپورٹ پر مداحوں کی بڑی تعداد انہیں خوش آمدید کرنے کے لیے پہنچ گئی اور جوڑے کا استقبال پھولوں کی پتیاں نچھاور کر کے کیا تھا۔

اسے بھی دیکھیں: مداحوں‌ کا انتظار ختم، دپیکا رنویر نے شادی کی تصاویر شیئر کردیں

دپیکا اور رنویر نے میڈیا سے مختصر گفتگو کی جس میں انہوں نے مداحوں کا شکریہ ادا کرتے ہوئے مستقبل میں دعا کرنے کی استدعا بھی کی۔

بھارت میں استقبالیہ تقاریب کا شیڈول

دپیکا اور رنویر اپنے ساتھی فنکاروں، دوستوں اور مداحوں کے لیے علیحدہ علیحدہ تقریبات کا انعقاد کریں گے، اداکارہ نے بنگلور میں 21 نومبر اور رنویر نے 28 نومبر کو ممبئی میں استقبالیہ دینے کا فیصلہ کیا جبکہ دونوں یکم دسمبر کو ممبئی میں ہی شادی کے جشن کی شاندار تقریب کا انعقاد کریں گے۔

Comments

comments

یہ بھی پڑھیں