محکمہ بلدیات نے این جی اوز کے تحت چلائے جانے ڈسٹرکٹ میونسپل کارپوریشن کے اسکولز اور کالجز کی تفصیلات طلب کر لی ہیں۔
اے آر وائی نیوز کے مطابق محکمہ بلدیات نے ڈسٹرکٹ میونسپل کارپوریشن کے اسکولز اور کالجز غیر سرکاری تنظیموں (این جی اوز) کے تحت چلائے جانے کے معاملے کا نوٹس لے لیا ہے اور اس حوالے سے محکمہ بلدیات نے ایسے تمام تعلیمی اداروں کی تفصیلات طلب کر لی ہیں جو این جی اوز کے تحت چلائے جا رہے ہیں۔
محکمہ بلدیات سندھ نے کراچی کے اضلاع شرقی، غربی، وسطی، کورنگی، کیماڑی اور ملیر کی ڈی ایم سیز سے تفصیلات طلب کی ہیں۔
اس حوالے سے محکمہ بلدیات کا کہنا ہے کہ بغیر اجازت اسکولز اور کالجز کو نجی این جی اوز کی ایڈمنسٹریشن دینا غیر قانونی ہے۔ ایسے تمام تعلیمی اداروں کی ڈسٹرکٹ انتظامیہ فوری تفصیلات فراہم کرے۔
محکمہ بلدیات کا کہنا ہے کہ اس سے قبل 6 اپریل کو بھی خط لکھا تھا تاہم اس کا جواب نہیں ملا۔ اب تمام ڈی ایم سیز کو تین دن کے اندر مکمل تفصیلات کا ریکارڈ فراہم کرنے کی ہدایت کی گئی ہے۔
