اسلام آباد : سندھ ہاؤس میں موجود سیاسی جماعتوں کے اراکین کی تفصیلات سامنے آگئیں ، ذرائع کا کہنا ہے کہ حکومتی اراکین کے علاوہ ن لیگ،ق لیگ و دیگر جماعتوں کے اراکین سندھ ہاؤس میں موجود ہے۔
تفصیلات کے مطابق سندھ ہاؤس کی اندرونی صورتحال کی تفصیلات سامنے آگئیں ، ذرائع کا کہنا ہے کہ سندھ ہاؤس کےتمام کمرے سندھ کے ایم این ایز اور ایم پی ایز کے نام پر بک ہیں۔
ذرائع نے بتایا کہ پی پی اوردیگرپارلیمنٹیرینزکےمعاملات شرجیل میمن اور ن لیگی اراکین اسمبلی کےمعاملات عطااللہ تارڑ دیکھ رہے ہیں۔
ذرائع نے کہا سندھ ہاؤس کی سیکیورٹی سندھ پولیس اسپیشل برانچ نےسنبھال لی جبکہ سندھ ہاؤس کے سیکیورٹی امور بلاول ہاؤس کےکرنل(ر)بابردیکھ رہے ہیں۔
ذرائع نے انکشاف کیا حکومتی اراکین کے علاوہ ن لیگ کے 16 اراکین سمیت ق لیگ ودیگرجماعتوں کے اراکین بھی سندھ ہاؤس میں موجود ہیں جبکہ ناشتہ اورکھانا بھی باہر سے منگوایا جارہا ہے۔
یاد رہے اس سے قبل وزیراعظم عمران خان کو سندھ ہاؤس کے اندر کی سرگرمیوں کی تصاویر اور ویڈیوز موصول ہوئی تھیں ، ذرائع کا کہنا تھا کہ تحریک انصاف کے کچھ اراکین اہلخانے کے ہمراہ سندھ ہاؤس میں قیام پذیرہیں۔
ذرائع کا کہنا تھا کہ وفاقی حکومت کے زیر انتظام حساس ادارے کی سندھ ہاؤس کی بذریعہ ڈرون کیمرہ سرویلنس جاری ہے جبکہ سندھ ہاؤس کے اطراف میں متعدد کیمرے بھی نصب کر دیئے گئے ہیں۔
وزیراعظم عمران خان نے اسلام آباد میں ہارس ٹریڈنگ کی کوشش کا نوٹس لیتے ہوئے سندھ ہاؤس کو ہارس ٹریڈنگ کی آماجگاہ نہ بننے دینے کا اعلان کیا ہے۔
