ڈھاکا: پاکستان اور بنگلا دیش کے درمیان کھیلے جارہے دوسرے ٹیسٹ کا دوسرا روز بھی بارش کی نذر ہوگیا ہے۔
تفصیلات کے مطابق ڈھاکا ٹیسٹ میچ کا دوسرا روز بھی بارش سے متاثر ہوا، کھیل کے دوسرے دن صرف 6 اوورز کا کھیل ہوسکا، مگر خراب روشی اور آف ڈی فیلڈ گیلی ہونے کے باعث دوسرے روز کا کھیل ختم کردیا گیا ہے۔
پاکستان نے پہلی اننگز میں 2 وکٹوں پر 188 رنز بنا لیے ہیں، میچ کے دوسرے روز اظہر علی نے ٹیسٹ کرکٹ میں اپنی 34 ویں نصف سنچری مکمل کی ، اظہر علی 52 اور بابر اعظم 71 رنز کے ساتھ کریز پر موجود ہیں۔
یہ بھی پڑھیں: ڈھاکا ٹیسٹ: دوسرے روز کا کھیل تاخیر کا شکار
ٹیسٹ میچ کے پہلے روز بھی کھیل بارش اور خراب روشنی کے باعث متاثر ہوا تھا، خراب روشنی کے باعث میچ مقررہ وقت سے پہلے ختم کردیا گیا تھا، ٹیسٹ میچ کے پہلے روزصرف 57 اوورز کا کھیل ہو سکا تھا۔
پاکستان نے کھیل کے پہلے روز 2 وکٹوں کے نقصان پر 161 رنز بنائے تھے، گذشتہ روز پاکستانی کپتان بابر اعظم نے ٹاس جیت کر پہلے بیٹنگ کا فیصلہ کیا تھا۔
اوپنر عابد علی اور عبداللہ شفیق نے پر اعتماد آغاز کرتے ہوئے پہلی وکٹ کے لئے 59 رنز کی شراکت قائم کی، عبداللہ شفیق 25 رنز بناکر آوٹ ہوئے، عابد علی 39 رنز بنا کر پویلین لوٹے۔
بنگلا دیش کی جانب سے دونوں وکٹیں تیج السلام نے حاصل کیں۔
دومیچوں پر مشتمل سیریز میں پاکستان کو ایک صفر کی برتری حاصل ہے۔
