لاہور: صوبائی دارالحکومت لاہور میں افسوسناک واقعے کے نتیجے میں تین افراد جاں بحق جبکہ آٹھ زخمی ہوگئے ہیں۔
ریسکیو ذرائع کے مطابق لاہور کے علاقے مناواں میں مسجد کا تعمیراتی کام جاری تھا، مزدور آج گنبد پر کام کررہے تھے کہ اچانک مسجد کا گنبد زمین پر آگرا، افسوسناک واقعے میں ایک شخص جاں بحق جبکہ دس سے زائد ملبے تلے آکر زخمی ہوئے۔
واقعے کی اطلاع ملنے پر امدادی ٹیمیں جائے حادثے پر پہنچیں اور گنبد کے ملبے تلے دبے افراد کو ریسکیو کرتے ہوئے انہیں سروسز اسپتال منتقل کیا، جہاں دوران علاج مزید دو زخمی دم توڑ گئے۔
ریسکیو ذرائع کا کہنا ہے کہ جاں بحق افراد کی شناخت ریاض، شفیق اور ناظم کے نام سے ہوئی، جبکہ اسپتال میں زخمیوں کو طبی امداد دی جارہی ہے۔
دوسری جانب حادثے سے متعلق پولیس کا کہنا ہے کہ اگر کسی کی غفلت یا لاپرواہی ہوئی تو اسکے خلاف قانونی کارروائی عمل میں لائی جائے گی۔
