کراچی : پولیس کی جانب سے ڈاکٹر بیربل کے قتل کی تحقیقات جاری ہے، ٹیم آج جائے وقوعہ کی جیوفینسنگ کرے گی اور واقعے کے وقت ایکٹیو موبائل فونز کا ڈیٹا حاصل کیا جائے گا۔
تفصیلات کے مطابق کراچی کے علاقے گارڈن میں ڈاکٹربیربل کی ٹارگٹ کلنگ کے واقعے کی پولیس کی جانب سے مختلف پہلوؤں سے تفتیش جاری ہے۔
پولیس کی ٹیم ایک مرتبہ پھر جائے وقوعہ پرپہنچ گئی ، ڈاکٹر بیربل کی گاڑی مختلف راستوں سے ہوتی ہوئی جائےوقوعہ پرپہنچی تھی ، پولیس بھی انہی راستوں سے ہوتی ہوئی موقع پرپہنچی۔
پولیس کی جانب سے مزید سی سی ٹی وی ویڈیوز حاصل کرلی گئی ہے ، تحقیقاتی ٹیم آج جائے وقوعہ کی جیوفینسنگ کرے گی اور واقعے کے وقت ایکٹیو موبائل فونز کا ڈیٹا حاصل کیا جائے گا۔
ذرائع نے بتایا کہ ٹیکنیکل طریقے سےمشتبہ نمبرز علیحدہ کیے جائیں گے، تفتیشی ٹیم اسپتال میں زخمی خاتون قرۃ العین کاتفصیلی بیان لےگی، قرۃ العین اور ڈاکٹر بیربل کے درمیان 11 سال سے شناسائی تھی۔
ڈاکٹر بیربل روزصبح 8بجےقرۃ العين کوگلشن اقبال سے پک کرکے اپنےساتھ کلینک لاتےتھے اور 12بجے قرۃ العین جناح اسپتال روانہ ہوجاتی تھیں، جس کے بعد شام میں دونوں اکٹھے گھر واپس جاتے تھے۔
کل بھی معمول کےمطابق گھر واپس جاتے ہوئےواقعہ پیش آیا ، قرۃ العين جناح اسپتال میں نرس ہے اور چند ماہ قبل تک قرۃ العين کا بھائی مقتول ڈاکٹر کےپاس ملازم رہا ہے ، تین ماہ قبل قرۃ العين کےبھائی اویس نےڈاکٹر کے پاس سےملازمت چھوڑی تھی۔
