ممبئی : بھارت میں بی جے پی رہنما جلسوں میں عوام کو مچھلی کھانے کے فوائد بتانے لگے، ان کا کہنا ہے کہ ایشوریہ رائے جیسی خوبصورت آنکھیں چاہیئں تو روزانہ مچھلی کھائیں۔
مہاراشٹر کے وزیر کے اس بیان پر ہنگامہ برپا ہوگیا، وجے کمار گاوِت نے مقامی گاؤں میں ماہی گیروں میں سامان تقسیم کرنے کی تقریب سے خطاب کیا، اس دوران وہ جوش خطابت میں اخلاقی اقدار بھی بھول گئے۔
وزیر نے کہا کہ مچھلی کھانے سے دو فائدے ہوتے ہیں، اگر خواتین کھاتی ہیں تو اس سے چہرہ چمک اٹھتا ہے، کیا کسی نے ایشوریہ رائے کو دیکھا ہے؟
انہوں نے لوگوں سے مچھلی کھانے کی اپیل کی اور انہیں ترغیب دیتے ہوئے کہا کہ اداکارہ ایشوریہ رائے روزانہ مچھلی کھاتی تھیں اس لیے ان کی آنکھیں اور جِلد خوبصورت ہے، اگر آپ بھی مچھلی کھائیں گے تو آپ کی آنکھیں بھی خوبصورت ہوں گی۔
گاوِت کے اس بیان پر کانگریس پارٹی اراکین نے ناراضگی کا اظہار کرتے ہوئے کہا ہے کہ وزیر کو اس طرح کے تبصرے کرنے کی جگہ قبائلیوں کے ایشوز پر توجہ دینی چاہیے۔
دوسری جانب بی جے پی کے ایک رکن اسمبلی نتیش رانے نے بھی تنقید کرتے ہوئے کہا کہ میں روزانہ مچھلی کھاتا ہوں، میری آنکھیں ویسی ہوجانی چاہیے تھیں۔ میں گاوِت صاحب سے پوچھوں گا کہ کیا آپ نے اس پر کوئی ریسرچ کی ہے؟
