اسلام آباد : سابق سیکریٹری الیکشن کمیشن کنور دلشاد کا کہنا ہے کہ الیکشن کمیشن تیس نومبر کے بعد انتخابات کا اعلان کرسکتا ہے، جس کےمطابق 25 سے 30 جنوری کے درمیان انتخابات ہوجائیں گے۔
تفصیلات کے مطابق سابق سیکریٹری الیکشن کمیشن کنور دلشاد نے اے آر وائی نیوز کے پروگرام باخبر سویرا میں گفتگو کرتے ہوئے کہا کہ عام انتخابات نزدیک آچکے، روڈ میپ تیارہے، الیکشن کمیشن تیس نومبر کے بعد انتخابات کا اعلان کرسکتا ہے۔
کنور دلشاد کا کہنا تھا کہ قانون کےمطابق شیڈول جاری ہونے کے پچاس دن کے اندر انتخابات ہونے ہیں، جس کےمطابق پچیس سے تیس جنوری کے درمیان انتخابات ہوجائیں گے، نوے دن کی بات بار بار کرکے ہیجان پیدا کیا جا رہا ہے۔
سیکریٹری الیکشن کمیشن نے کہا کہ آئین میں90دن میں انتخابات کا ذکر کیا گیاہے، الیکشن کمیشن اس وقت حلقہ بندیاں کروارہاہے، الیکشن کمیشن کاکہناہے20نومبرتک حلقہ بندیاں مکمل کرلیں گے ، جس کے بعد الیکشن کمیشن نومبر تک انتخابات کا شیڈول جاری کردے گا۔
صدرمملکت الیکشن کمیشن کوتجویز دے سکتے ہیں،صدر کی رائے پر الیکشن کمیشن خاموش رہےگا۔
