اسلام آباد: الیکشن کمیشن نے پی پی اڑتیس سیالکوٹ میں ضمنی انتخاب کا شیڈول جاری کردیا ہے، نشست چوہدری خوش اختر کی وفات کےباعث خالی ہوئی تھی۔
تفصیلات کے مطابق پی پی اڑتیس سیالکوٹ میں ضمنی انتخاب اٹھائیس جولائی کو ہوگا، امیدوار سات سے دس جون تک کاغذات نامزدگی جمع کرا سکیں گے، امیدواروں کے ناموں کی ابتدائی فہرست گیارہ جون کو جاری کی جائے گی، کاغذات کی جانچ پڑتال اٹھارہ جون تک ہوگی۔
الیکشن کمیشن کے مطابق امیدوار ریٹرننگ افسر کےفیصلوں کےخلاف بائیس جون تک اپیلیں دائر کر سکیں گے، یکم جولائی کو ضمنی الیکشن میں حصہ لینے والے امیدواروں کو انتخابی نشانات الاٹ کیےجائیں گے۔
دوسری جانب الیکشن کمیشن نے پی پی38سیالکوٹ میں ضمنی انتخاب پر اہم اعلامیہ جاری کیا ہے، اعلامیہ میں کہا گیا کہ سیالکوٹ میں اٹھائیس جولائی تک سرکاری محکموں میں پوسٹنگ ٹرانسفر پر پابندی ہوگی، سرکاری حکام ، رکن ا سمبلی یا بلدیاتی نمائندہ ترقیاتی منصوبوں کا اعلان نہیں کر سکتا، حلقے میں پابندیاں 28 جولائی کو ضمنی انتخاب تک لاگو رہیں گی۔
یاد رہے کہ مذکورہ نشست مسلم لیگ ن کے رکن پنجاب اسمبلی و سابق صوبائی وزیر چوہدری خوش اختر سبحانی کے انتقال کے باعث خالی ہوئی ہے، چوہدری خوش اختر سبحانی قومی اسمبلی کے رکن چوہدری ارمغان سبحانی کے کزن تھے۔
