ریاض : عید کا چاند دیکھنے کے لئے سعودی عرب اور متحدہ عرب امارات میں اجلاس آج ہوگا جبکہ برطانیہ، یورپ اورامریکا میں کل عید ہونے کا امکان ہے۔
رمضان المبارک کے اختتام پر دنیا بھرکے مسلمانوں کو عید کا انتظار ہوتا ہے، مختلف ملکوں میں عید کا چاند دیکھنے کی تیاریاں مکمل کرلی گئیں ہیں، کل عید ہوگی یا روزہ، متحدہ عرب امارات اور سعودی عرب میں عید کا چاند دیکھنے کے لئے اجلاس آج ہوگا۔
سعودی عرب میں شہریوں سے اپیل کی گئی ہے کہ شہری چاند دیکھنے کیلئےدوربین اور سادہ طریقہ اپنائیں اور چاند نظرآنے کی صورت میں قریبی سرکاری ادارے یا عدالت پہنچ کر شہادتیں قلمبند کرائیں۔
میڈیا رپورٹس کے مطابق برطانیہ، امریکا اور کینیڈا میں کیلنڈر پر عمل کرنے والی تنظیمیں اور مساجد اتوار کو عید منائیں گی جبکہ چاند دیکھ کر فیصلہ کرنے والی تنظیمیں آج اجلاس میں فیصلہ کریں گی۔
بھارت اور بنگلہ دیش میں بھی عید کا چاند دیکھنے کے لئے اجلاس کل ہوں گے۔
