برسلز : یورپی یونین ممالک میں نئی پٹرول اور ڈیزل کاروں کی فروخت پر پابندی کی منظوری دے دی گئی ہے مذکورہ پابندی 2035 سے نافذالعمل ہوگی۔
یورپی پارلیمنٹ نے کہا ہے کہ تمام رکن ممالک میں فروخت ہونے والی تمام نئی کاریں اور ہلکی کمرشل گاڑیوں کے گیسوں کا اخراج صفر ہونا چاہیے۔
نئے قانون کے مطابق کمپنیوں کو دھواں خارج کرنے والی گاڑیاں بنانا بند کرنا ہوگا، قانون کے مطابق سال 2035 سے 27ممالک میں ڈیزل اور پٹرول انجن گاڑیوں کی فروخت ممنوع ہوگی۔
ماہرین ماحولیات کی جانب سے پارلیمنٹ کے فیصلوں کو سراہا گیا ہے، برسلز میں قائم ٹرانسپورٹ اور ماحولیات کے اتحاد نے کہا ہے کہ اس قانون نے مستقبل میں ماحولیاتی تبدیلیوں سے بچنے کا ایک بہترین موقع پیش کیا ہے۔
غیرملکی خبر رساں ادارے روئٹرز کی رپورٹ کے مطابق فرانس کے شہر اسٹراسبرگ میں منعقدہ ای پی جنرل اسمبلی کے اجلاس میں اس قانون کے حق میں 340 اور خلاف 279 ووٹ ملے جبکہ اس قانون پر احتجاج کرنے والوں کی تعداد 21 تھی۔
اس مرحلے کے بعد یہ قانون یورپی یونین کونسل کی طرف سے باضابطہ طور پر منظور ہونے اور یورپی یونین کے سرکاری جرنل میں شائع ہونے کے بعد نافذ ہوجائے گا۔
