میکسیکو: بیٹی کی سالگرہ کے موقع پر ایک شخص نے فیس بک پر دعوت عام پوسٹ کی تو یہ بہت تیزی سے وائرل ہوئی اور سالگرہ کی تقریب میں ہزاروں لوگ پہنچ گئے۔
تفصیلات کے مطابق میکسیکو سے تعلق رکھنے والی ایک لڑکی کی سالگرہ پر اُس کے والد نے رسماً دعوت نامہ فیس بک پرپوسٹ کیا تواسے لاکھوں لوگوں نے تسلیم کیا اور ساتھ ہی ساتھ ہزاروں لوگ غیر متوقع طور پر تقریب میں پہنچ گئے۔
مہمانوں کی بڑی تعداد کو دیکھتے ہوئے سیکیورٹی کے لیے پولیس طلب کی گئی تو میڈیا نمائندے بھی خبر کی کھوج میں اُس مقام پر پہنچ گئے، جس کے بعد 15 برس کی عام لڑکی اسٹار بن گئی۔
میکسیکن شخص نے سالگرہ کے لیے جو انتظامات کیے تھے وہ چند سو افراد کے لیے تھے تاہم عوام کی اتنی بڑی تعداد کے پہنچنے کے بعد اُس نے تقریب کو کھلے میدان میں منعقد کیا، بعد ازاں یہ تقریب میلے کا منظر پیش کرنے لگی۔
لڑکی کے والد کا کہنا ہے کہ ’’فیس بک کے توسط سے دوستوں اور ہمسایوں کو دعوت دی تاہم نامعلوم وجوہات کی بنا پر اُن کے دعوت نامے کی ویڈیو وائر ہوئی اور دور دراز سے ہزاروں لوگ سالگرہ میں شرکت کے لیے پہنچ گئے‘‘۔
انہوں نے کہا کہ ’’مہمانوں کی اتنی بڑی تعداد دیکھ کر حیرت اور پریشانی ہوئی تاہم جب بیٹی کو ایک اسٹار کے روپ میں دیکھا اور میڈیا نے اس کو توجہ دی تو یہ پریشانی خوشی میں تبدیل ہوگئی، تاہم یہ تجربہ بہت تلخ مگر اچھا رہا‘‘۔
