اسلام آباد: وفاقی حکومت نے صوبوں کو نیگلیریا کے حوالے سے خبردار کر دیا، قومی ادارہ صحت نے ہنگامی ایڈوائزری جاری کر دی۔
تفصیلات کے مطابق قومی ادارہ صحت نے وفاقی، صوبائی محکمہ صحت، واٹرو سینیی ٹیشن ایجنسیز کو ایڈوائزری ارسال کردی۔
قومی ادارہ صحت کا کہنا ہے کہ ایڈوائزری کا مقصد شہریوں کو جان لیوا مرض بارے آگاہی فراہم کرنا اور متعلقہ اداروں کو نیگلیریا سے متعلق خبردار کرنا ہے۔
ایڈوائزری میں کہا گیا کہ متعلقہ ادارے نیگلیریا کی روک تھام کیلئے پیشگی اقدامات کریں، مشتبہ نیگلیریا کیسز کی بروقت شناخت اور علاج کیلئے اقدامات کیے جائے۔
قومی ادارہ صحت کا کہنا ہے کہ پاکستان میں نیگلیریا کیسز، اموات 2008 سے رپورٹ ہو رہی ہیں، پاکستان میں نیگلیریا کیسز کراچی، مختلف شہروں سے رپورٹ ہو رہے ہیں، 14 سال میں پاکستان میں نیگلیریا سے 150 سے زائد اموات ہو چکی ہیں جبکہ رواں برس ملک میں نیگلیریا سے تین اموات ہو چکی ہیں۔
ایڈوائزری میں کہا گیا کہ نیگلیریا کا پھیلاو روکنے کیلئے قبل از وقت ہنگامی اقدامات ناگزیر ہیں، کراچی جیسے بڑے شہروں میں نیگلیریا کنٹرول کیلئے لانگ ٹرم پلاننگ کی جائے۔
نیگلیریا کیا ہے؟
قومی ادارہ صحت کا کہنا ہے کہ نیگلیریا فولیری خاص قسم کےامیبا سے لاحق ہونے والا انفیکشن ہےنیگلیریا کا امیبا صاف گرم پانی میں پایا جاتا ہے، نیگلیریا مٹی،گرم میٹھے پانی، جھیل، تالاب، گرم چشموں میں رہتا ہے، اس کے بیشتر کیسز موسم گرما کے دوران سامنے آتے ہیں۔
نیگلیریا سے کب متاثر ہوسکتے ہیں؟
قومی ادارہ صحت کا بتانا ہے کہ نیگلیریا نہانے، تیراکی کے دوران ناک سے جسم میں داخل ہوتا ہے، یہ شریانوں کے ذریعے انسانی دماغ تک پہنچ جاتا ہے، اس کا امیبا دماغ کھانے والا انفیکشن ہے، دماغ میں انفلیمیشن، رگیں پھٹنے کا باعث بنتا ہے، نیگلیریا کے مریض کا انکیوبیشن پیریڈ دو تا پندرہ روز کا ہے۔
علامات
ایڈوائزری میں بتایا گیا کہ نیگلیریا کی علامات گردن توڑ بخار سے ملتی جلتی ہیں،، اس کا مریض شدید اعضابی و زہنی تکلیف میں مبتلا رہتا ہے، نیگلیریا کی علامات میں تیز بخار، سر درد، قے، گردن میں کھچاؤ شامل ہے۔
نیگلیریا کی علامات میں بھوک کی کمی، چڑ چڑاپن، بے چینی پائی جاتی ہے، روشنی سے ڈر، اعصابی معذوری اور جھٹکے بھی اس کی علامات ہیں، ایڈوائزری میں بتایا گیا اعصابی معذوری، جھٹکے نیگلیریا کے آخری اسٹیج کی علامات ہیں۔
ایڈوائزری کے مطابق نیگلیریا کی آخری کلینیکل اسٹیج پر مریض کوما میں چلا جاتا ہے، متاثرہ مریض تین سے سات روز میں انتقال کر جاتے ہیں، کیسز میں اموات کی شرح ستانوے فیصد سے زائد ہے، پچھتر فیصد کیسز میں نیگلیریا کی تشخیص موت کے بعد ہوتی ہے۔
ایڈوائزری میں کہا گیا کہ نیگلیریا کی تشخیص ہسٹری، معائنہ و علامات سے ممکن ہے، اس کی تصدیق کیلئے سی ایس ایف سیمپل کی مائیکرو اسکوپی ہوتی ہے، اس کی تصدیق کیلئے دماغ و ریڑھ کی ہڈی سے محلول لیا جاتا ہے۔
ایڈوائزری میں مزید بتایا گیا کہ نیگلیریا کی جلد تشخیص و علاج سے مریض کی جان بچائی جا سکتی ہے، کلورین کا استعمال نیگلیریا کا فوری اور مکمل خاتمہ کرتا ہے، محکمہ واٹر سپلائی پانی میں کلورین کی مقررہ مقدار شامل کرے، متعلقہ ادارے واٹر ٹینک، پائپوں کی صفائی کا خیال رکھیں۔
