لاہور: لاہور کے علاقے علامہ اقبال ٹاﺅن میں آگ بجھانے کیلئے جانے والا ریسکیو اہلکار کرنٹ لگنے سے جاں بحق ہو گیا ہے۔
تفصیلات کے مطابق علامہ اقبال ٹاﺅن کے رچنا بلاک میں آگ بجھانے کیلئے جانے والی ریسکیو ٹیم پر بجلی کے تار گر گئے جس کے نتیجے میں ایک اہلکار موقع پر ہی جاں بحق ہو گیا اور دو جھلس کرزخمی ہو گئے جنہیں قریبی ہسپتال منتقل کر دیا گیا ہے۔
بجلی کے تار گرنے کے بعد ریسکیو کی گاڑی کو بھی آگ لگ گئی دونوں زخمی اہلکار وں کو آئی سی یو میں منتقل کردیا گیا ہے۔
ذرائع کا کہنا ہے کہ ریسکو کو علامہ اقبال ٹائون کے علاقے میں عمارت کے اددر آگ لگنے کی اطلاع ملی تھی جس کے لیے ریسکیو ٹیم جائے حادثہ کی جانب جا رہی تھی کہ رچنا بلاک کے قریب گاڑی پر بجلی کے تار ٹوٹ کر گر گئے۔
پولیس کا کہنا ہے کہ بجلی کے تار گرنے سے ہلاک ہونے والے فائر بریگیڈ کے ملازم کا پوسٹ مارٹ کیا جا رہا ہے جس کی رپورٹ آنے کے بعد تحقیقات کا دائرہ وسیع کیا جائے گا اور غفلت برتنے والے شخص یا ادارے کو قانون کی گرفت میں لایا جائے گا۔
