راولپنڈی : انتظامیہ کی غفلت اور لاپرواہی کے سبب فلور ملز مالکان نے آٹے کی فی بوری پر چھ سو سے آٹھ سو روپے تک اضافہ کر دیا،جس کے بعد نان بائیوں نے بھی روٹی کی قیمت میں اضافے کا عندیہ دیا ہے۔
تفصیلات کے مطابق وفاقی دارالحکومت میں فلور ملز مالکان نے80 کلو آٹے کی بوری کی قیمت میں 600سے 80روپے کا من مانا اضافہ کردیا۔
اسی کلو فائن آٹے کی بوری تین ہزار سات سو کے بجائے چار ہزار پانچ سو روپے اور اسی کلو لال آٹے کی بوری تین ہزار دو سو کے بجائے تین ہزار چھ سو روپے میں فروخت کی جا رہی ہے۔
مارکیٹ ذرائع کے مطابق نان بائیوں نے روٹی اور نان کی قیمت میں ایک سے دو روپے اضافے کرنے اور روٹی کا وزن کم کرنے کا اشارہ دے دیا ہے۔ دوسری جانب شہر میں سرخ آٹے کا اسٹاک بھی ختم ہونے والا ہے اور بیشتر مقامات پر سرخ آٹے کی جزوی قلت پیدا ہوگئی ہے۔
مزید پڑھیں: پیٹرول کے بعد آٹے کی قیمت میں بھی اضافہ
ذرائع کے مطابق فلور ملز مالکان کا کہنا ہے کہ گندم مہنگی ہونے سے آٹے کی قیمتوں میں اضافہ کیا گیا ہے، اوپن مارکیٹ میں گندم مہنگی فروخت کی جارہی ہے، گندم کی قیمت میں کمی ہوئی تو آٹا بھی سستا کردیں گے۔
