کراچی: شہر قائد میں طارق روڈ پر ایک سنار کی دکان میں ڈکیتی کی واردات ہوئی ہے، مسلح ملزمان لاکھوں مالیت کا سونا اور کیش لوٹ کر فرار ہو گئے۔
تفصیلات کے مطابق طارق روڈ پر سنار کی دکان میں ڈکیتی کی سی سی ٹی وی فوٹیج سامنے آ گئی ہے، واردات میں مسلح ملزمان لاکھوں مالیت کا سونا اور کیش لوٹ کر فرار ہو گئے تھے، یہ واردات گزشتہ شام پونے 7 بجے ہوئی۔
سلیمان جیولرز پر ہونے والی ڈکیتی کے دوران پہلے دو ملزمان جیولرز شاپ کے اندر اسلحہ لے کر داخل ہوئے، چند لمحوں بعد مزید دو ملزمان بھی پہنچ گئے۔
سی سی ٹی وی فوٹیج میں واردات کے وقت دکان کے باہر چہل پہل بھی دیکھی جا سکتی ہے، ملزمان کے پیچھے چائے ہوٹل کا ملازم بھی داخل ہونے لگا لیکن واردات ہوتی دیکھ کر واپس ہو گیا، اس دوران مسلح ملزمان بے خوفی کے ساتھ آرام سے واردات کرتے رہے۔
دکان دار کے مطابق واردات کے دوران 20 لاکھ سے زائد مالیت کا سونا لوٹا گیا، دکان میں موجود 2 لاکھ روپے کیش بھی لوٹا گیا، واردات کے بعد پولیس کو بھی اطلاع کر دی تھی، آج مقدمہ درج کروائیں گے۔
ملزمان نے دکان میں بیٹھے کسٹمرز کو بھی کنگال کر دیا، گاہکوں کے موبائل فونز، پرس اور قیمتی سامان بھی لوٹا گیا۔
