کراچی : کراچی سمیت سندھ بھر میں بارش کا سلسلہ آج سے شروع ہوگا، پی ڈی ایم اے نے ممکنہ طوفانی بارشوں کے پیش نظر الرٹ جاری کردیا ہے۔
تفصیلات کے مطابق کراچی سمیت سندھ بھر میں بارش کاسلسلہ آج سے شروع ہوگا، محکمہ موسمیات کا کہنا ہے کہ صبح سے سسٹم کے اثرات کے تحت مطلع ابر آلود اور موسم خوشگوار ہے.
محکمہ موسمیات نے بتایا کہ مغربی ہواوٴں کا سسٹم آج شہر میں داخل ہوگا، سسٹم کے تحت گرج چمک کے بادل بننے کے امکان کے ساتھ تیز ہوائیں ، ہلکی سے درمیانی اور کہیں کہیں تیز بارش متوقع ہیں۔
بارش کا سسٹم تین مئی تک سندھ کے بالائی اورمشرقی علاقوں سکھر ،گھوٹکی تھرپارکر، بدین، دادو، قمبرشہداد کوٹ ، لاڑکانہ اور میرپورخاص میں تیز بارش کے ساتھ اثر انداز ہوسکتا ہے۔
محکمہ موسمیات کے مطابق بارش کا سلسلہ شہر میں یکم مئی کی رات تک جاری رہ سکتا ہے، آج زیادہ سے زیادہ درجہ حرارت 35 ڈگری سینٹی گریڈ رہنے کا امکان ہے۔
دوسری جانب سندھ میں ممکنہ طوفانی بارشوں کے پیش نظر پی ڈی ایم اے نے متعلقہ اداروں کو تیار رہنے کے لیے الرٹ اور ہدایات جاری کردیں۔
پی ڈی ایم اے نے صوبے بھر کی ضلعی انتظامیہ کو ممکنہ بارشوں سے نمٹنے کے لیے تیار رہنے کی ہدایت جاری کرتے ہوئے کہا ہے کہ سندھ بھر کے کمشنرز اور ڈپٹی کمشنرز بارشوں سے متعلق ایمرجنسی پلان مرتب کرلیں۔
محکمہ موسمیات نے 28 اپریل تا یکم مئی طوفانی بارشوں کی پیش گوئی کررکھی ہے، پیش گوئی کے مطابق میرپورخاص، لاڑکانہ، بدین، سانگھڑ، مٹیاری، عمرکوٹ، بدین، قمبر اور شہداد کوٹ میں طوفانی بارشوں سے طغیانی کا خدشہ ہے۔
اس سلسلے میں سندھ کے تمام اضلاع میں ایمرجنسی ہیلپ لائن قائم کرنے کی ہدایت کی گئی ہے، جس میں کہا گیا ہے کہ ادویات سمیت عوام کے استعمال کی ضروری اشیا اسٹاک کرلی جائیں۔
اسپتالوں کو ہنگامی صورتحال سے نمٹنے کیلئے چوبیس گھنٹے تیار رہنے کی ہدایت کی گئی ہے۔
