پیرس: فرانس میں سڑک پر طالبہ کو ہراساں کرنے اورسرِ عام تھپڑ مارنے کی ویڈیو نے ملک بھر میں ہلچل مچادی، فرانس میں خواتین کو ہراساں کرنے پر جرمانے کا بل پارلیمنٹ میں زیرِ غور ہے۔
تفصیلات کے مطابق میری لاگیورے نامی طالبہ نے ایک سی سی ٹی وی کیمرے کی فوٹیج شیئر کی ہے جس میں دیکھا جاسکتا ہے کہ جب انہوں نے ہراساں کرنے والے شکص کو للکارا تو اس نے انہیں تھپڑ رسید کردیا۔
یہ ویڈیو ملک بھر میں وائرل ہوگئی اور اس کے بعد عوام ی جانب سے ہراساں کرنے والوں کو سزا دینے کا مطالبہ زور پکڑنے لگا، یاد رہے کہ فرانس کی حکومت پہلے ہی ہراساں کرنے والوں کو موقع پر ہی جرمانہ کرنے کی منصوبہ بندی کررہی ہے۔
اس موقع پر فرانس کی وزیر برائے برابری مارلن شیاپا کا کہنا ہے کہ امید ہے کہ اس موسمِ خزاں سے ہم یہ جرمانے شروع کرسکیں گے۔ بتایا جارہا ہے کہ فرانس میں ہراساں کرنے پر 75 سے 90 یورو تک کے جرمانے ہوسکیں گے۔ اس فیصلے کی فرانس کے ممبران پارلیمنٹ نے مئی میں حمایت کی تھی اور رواں ہفتے اس کی منظوری کا امکان ہے۔
طالبہ کی جانب سے شیئر کی گئی ویڈیو میں دیکھا جاسکتا ہے کہ کس طرح ہراساں کرنے پر طالبہ نے اسے للکارا جواب میں اس شخص نے اسے تھپڑ رسید کردیا۔ طالبہ نے مقامی ریڈیو کو بتایا کہ یہ پہلی بار نہیں تھی اور یہ شخص اس سے پہلے بھی اس قسم کی حرکات کرچکا ہے تاہم اس بار وہ کیفے کے کیمرے کی ریکارڈنگ میں آگیا ہے۔
خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں
