غزہ میں اسرائیلی مظالم کا سلسلہ تاحال جاری ہے، ایسے میں ایک فلسطینی جوڑے نے انتہائی سادگی سے شادی کرلی۔
غیر ملکی ذرائع ابلاغ کے مطابق 7 اکتوبر 2023 سے مظلوم فلسطینیوں پر اسرائیلی مظالم کاسلسلہ جاری ہے،جس میں اب تک ہزاروں افراد جام شہادت نوش کرچکے ہیں، جن میں بہت بڑی تعداد بچیوں اور خواتین کی ہے۔
اسرائیلی بربریت سے غزہ میں خوراک اور ادویات کے مسائل میں بے پناہ اضافہ ہوچکا ہے، جبکہ عالمی ادارہ صحت نے بھی اس حوالے سے الرٹ جاری کردیا ہے۔
رفح کے پناہ گزین کیمپ میں جنگ کے ماحول میں بھی فلسطینی خاندان نے اپنے بچوں کی شادی کی رسوم انتہائی سادگی سے انجام دیں، بتایا جارہا ہے کہ جوڑے کی شادی اسرائیلی حملے سے قبل طے کی جاچکی تھی۔
یہ خاندان اسرائیل کی وحشیانہ بمباری کے نتیجے میں اپنے گھروں سے محروم ہونے کے بعد پناہ گزین کیمپوں میں زندگی بسر کرنے پر مجبور ہیں۔
شادی کرنے والے جوڑے کے والدین نے بتایا کہ جنگ رکنے کا نام نہیں لے رہی، ایسے میں ہم نے یہ درست جانا کہ اس سوگوار ماحول میں خوشی کے نغمے بکھیر دیں تاکہ لوگوں کے چہروں پر مسکراہٹیں بکھر جائیں۔
شادی کی تقریب میں دلہن نے روایتی لباس زیب تن کر رکھا تھا، شادی میں کیمپ میں رہائش پذیر دیگر فلسطینی بھی شریک ہوئے، نغمے گائے گئے اور کھانے کا بھی اہتمام کیا گیا۔
