The news is by your side.

Advertisement

خلیج تعاون کونسل کانفرنس، افتتاحی سیشن میں‌ سربراہانِ مملکت نے کیا گفتگو کی؟

ریاض: سعودی ولی عہد اور وزیردفاع شہزادہ محمد بن سلمان کی سربراہی میں العلا کانفرنس کا آغاز ہوگیا، افتتاحی سیشن میں امیر کویت نے خلیجی بحران کے خاتمے کو خوش آئند قرار دیا۔

عرب میڈیا رپورٹ کے مطابق سعودی ولی عہد اور وزیردفاع کی سربراہی میں خلیج تعاون کونسل (جی سی سی) کے سربراہی اجلاس کا آغاز ہوگیا۔

محمد بن سلمان نے افتتاحی تقریب سے خطاب کرتے ہوئے خلیجی ممالک کے سربراہان کو کانفرنس میں شرکت پر خوش آمدید کہا اور اُن کا شکریہ بھی ادا کیا۔

سعودی وزیردفاع نے اس کانفرنس کو عمان کے امیر سلطان قابوس اور کویت کے امیر شیخ صباح الصباح کے نام سے منسوب کرنے کا اعلان بھی کیا۔

افتتاحی سیشن میں امیر کویت شیخ نواف نے بھی خطاب کیا جس کے دوران انہوں نے خلیجی ممالک کے درمیان کشیدگی ختم ہونے اور بحران کے خاتمے کو خوش آئند قرار دیا۔

مزید پڑھیں:سعودی عرب کے تاریخی شہر العلاء کے خوبصورت مناظر

قبل ازیں‌ سعودی ولی عہد نے کانفرنس میں شرکت کے لیے پہنچنے والے وفود کا ایئرپورٹ پر استقبال کیا، جس کے بعد خلیجی ممالک بشمول قطر کے سربراہان اپنے وفود کے ہمراہ العلا کے مرایا ہال پہنچے۔

اجلاس سے قبل گفتگو کرتے ہوئے محمد بن سلمان کا کہنا تھا کہ خادم الحرمین شریفین شاہ سلمان بند عبد العزیز کی زیر قیادت سعودی عرب خلیج تعاون کونسل اور عرب ممالک کے اعلیٰ مفادات کی پالیسی پر کاربند ہے۔

یہ بھی پڑھیں: سعودی ولی عہد اور امیرقطر کا بڑا فیصلہ

اُن کا کہنا تھا کہ ’سعودی عرب خلیجی اور عرب عوام کی فلاح و بہبود اور امن و استحکام کے لیے اپنی جملہ توانائیاں وقف کیے ہوئے ہیں، ہم اس سلسلے کو عوام کے لیے جاری رکھیں گے‘۔

افتتاحی سیشن کے بعد تمام ممالک کے سربراہان اور وفود نے العلا کانفرنس کے اعلامیے سے متفق ہوکر اس پر دستخط بھی کیے۔

Comments

یہ بھی پڑھیں