کراچی : عالمی برادری کی جانب سے سیلاب متاثرین کی مدد اور بحالی کا سلسلہ جاری ہے جرمن قونصل خانے کی جانب سے تحصیل جڈھو کے گوٹھ نیاز محمد میں متاثرین کے لئے طبی کیمپ قائم کیا گیا ہے۔
طبی کیمپ میں صوبہ سندھ کے سیلاب زدگان کو علاج کی سہولیات اور مفت ادویات فراہم کی جارہی ہیں۔ جرمن قونصل جنرل ڈاکٹر روڈیگر لوٹز نے سیلاب متاثرین کے طبی کیمپ کا معائنہ کیا۔
اس موقع پر گفتگو کرتے ہوئے جرمن قونصل جنرل ڈاکٹر روڈیگر لوٹز نے کہا کہ موسمیاتی تبدیلی کو کنٹرول کرنے کے لئے پاکستان سمیت دنیا بھر ممالک کو اقدامات کرنے ہوں گے۔
انہوں نے کہا کہ موسمیاتی تبدیلی ایک گلوبل چیلنج ہے اور مستقبل میں ایسے سانحات سے بچنے کے لئے مل کر کام کرنا انتہائی ضروری ہے۔
اس کے علاوہ جرمن قونصل جرمن قونصل ڈاکٹر روڈیگر لوٹز نے ٹنڈو جان محمد کے میری ایڈیلیڈ لیپروسی سینٹر میں پینے کے صاف پانی کے لیے آراو پلانٹ کا افتتاح کیا۔
جرمن قونصل جنرل نے دورے میں سیلاب متاثرین میں راشن بیگز بھی تقسیم کیے۔ متاثرین نے حکومتی امداد کی اپیل کی ہے تا کہ ان کی جلد بحالی ممکن ہوسکے۔
