برلن: جرمنی نے بھی کرونا وبا کے باعث عائد پابندیوں میں نرمی کر دی ہے، حالات میں بہتری کے پیش نظر بعض علاقوں میں اسکول بھی کھلنا شروع ہو گئے ہیں۔
تفصیلات کے مطابق کئی یورپی ممالک کے بعد جرمنی نے بھی لاک ڈاؤن میں نرمی کر دی ہے، چند علاقوں میں اسکول کھول دیے گئے ہیں، حجام کی دکانیں، سیلون بھی تقریباً 2 ماہ کی بندش کے بعد دوبارہ کھلنا شروع ہو گئے ہیں۔
خیال رہے کہ کرونا وائرس سے جرمنی میں 7 ہزار افراد ہلاک ہو چکے ہیں جب کہ متاثرہ افراد کی تعداد 166,152 ہو گئی ہے، جن میں سے 1 لاکھ 35 ہزار مریض صحت یاب ہو چکے ہیں اور 2 ہزار کے قریب مریضوں کی حالت تشویش ناک ہے۔
اطالوی حکومت نے لاک ڈاؤن میں آج سے نرمی کر دی
گزشتہ روز سے کرونا وائرس کی عالمگیر وبا سے شدید متاثرہ ملک اٹلی میں بھی حکومت نے لاک ڈاؤن میں نرمی کر دی ہے، اطالوی حکومت نے آٹھ ہفتوں بعد لاک ڈاؤن میں نرمی کرتے ہوئے اعلان کیا کہ کام کی غرض سے اب لوگ اپنے گھر سے باہر جا سکتے ہیں۔
فرانس بھی 11 مئی سے لاک ڈاؤن میں نرمی کا اعلان کر چکا ہے، وزیر اعظم ایڈورڈ فلپ کا کہنا تھا کہ گیارہ مئی کے بعد سے ملک بھر کی دکانیں اور مارکیٹیں کھولی جائیں گی، تاہم ریسٹورنٹس نہیں کھولے جائیں گے۔
کرونا کی عالمگیر وبا: ڈھائی لاکھ سے زائد ہلاک، 36 لاکھ 46 ہزار انسان متاثر
ایرانی صدر حسن روحانی نے بھی گزشتہ کل سے کرونا کے کم خطرات والے علاقوں میں مساجد کھولنے کا اعلان کر دیا تھا، ایک اعلیٰ سطح اجلاس میں کرونا وائرس سے کم متاثرہ علاقوں میں معمولات زندگی مرحلہ وار بحال کرنے کا فیصلہ کیا گیا۔
گزشتہ روز وزیر اعظم عمران خان نے بھی لاک ڈاؤن میں بتدریج کمی کا اعلان کرتے ہوئے کہا تھا کہ عام آدمی کے مسائل کے پیش نظر لاک ڈاؤن میں بتدریج نرمی کی جائے گی، اس سلسلے میں حفاظتی اقدامات پر مبنی جامع ایس اوپیز بھی تیار کر لیے گئے ہیں۔
