سڑک پار کرتے ہوئے بالخصوص بڑی شاہراہوں کو عبور کرتے ہوئے نہایت احتیاط ضروری ہوتی ہے، ورنہ جان سے ہاتھ دھو بیٹھنے پڑ سکتے ہیں، سعودی عرب میں ایسا ہی ایک دل دہلا دینے والا واقعہ ایک گاڑی کے ڈیش بورڈ کیمرے میں ریکارڈ ہوا ہے، جس میں لڑکی کچلے جانے سے بال بال بچی۔
سعودی عرب میں سوشل میڈیا پر ایک ویڈیو تیزی کے ساتھ وائرل ہو رہی ہے، اس ویڈیو میں ایک لڑکی کو مصروف شاہراہ کو تیز رفتار گاڑیوں کے درمیان گزرتے دیکھا جا سکتا ہے، لڑکی تیز رفتار گاڑیوں سے ٹکرانے سے بال بال بچی۔
ویڈیو میں دیکھا جا سکتا ہے کہ جب ڈرائیور نے دیکھا کہ مصروف سڑک پر اچانک ایک لڑکی سڑک عبور کرنے کے لیے چل پڑی ہے، تو وہ حیران رہ گیا، صورت حال اتنی خطرناک تھی کہ لڑکی کو بھی تیز رفتار گاڑیوں کو دیکھ کر اپنی غلطی کا احساس ہو گیا، لیکن اسے سمجھ نہیں آیا کہ اسے کیا کرنا چاہیے۔
— مكة (@maka85244532) October 30, 2023
ایسے میں گاڑی کے ڈرائیور نے پھرتی دکھائی اور اپنی گاڑی ٹریک سے ہٹا کر دوسری ٹریک پر لے گیا، تاکہ لڑکی اس کی زد پر نہ آئے اور وہ پہنچنے سے پہلے ہی گزر جائے۔ یہی ہوا، گاڑی کو اتنا موقع مل گیا کہ جیسے ہی لڑکی بالکل پاس پہنچ گئی، گاڑی تیزی سے اس کے آگے سے نکل گئی۔
صارفین نے ویڈیو دیکھ کر طرح طرح کے تبصرے کیے، سابقہ ٹوئٹر اور ایکس پر ایک صارف نے مشورہ دیا کہ اس بات کو ضرور یقینی بنایا جائے کہ آنے والی گاڑی بہت دور ہے۔
