اسلام آباد: کم سن گھریلو ملازمہ رضوانہ پر تشدد پر وفاقی دارالحکومت کے سول جج عاصم حفیظ کی اہلیہ سومیہ کے خلاف ایف آئی آر درج کر دی گئی۔
تفصیلات کے مطابق 14 سالہ گھریلو ملازمہ رضوانہ پر سول جج عاصم حفیظ کی بیوی کے مبینہ تشدد کے معاملے پر پولیس نے تھانہ ہمک میں تشدد کا مقدمہ درج کر لیا، پولیس نے متاثرہ بچی کے مبینہ الزام پر اس کے والد کی درخواست پر یہ مقدمہ درج کیا ہے۔
مقدمہ حبس بے جا میں رکھنے اور جان سے مارنے کی دھمکیوں کی دفعات کے تحت درج کیا گیا ہے، ایف آئی آر متن کے مطابق 14 سالہ رضوانہ 10 ہزار روپے ماہانہ پر سول جج عاصم حفیظ کے گھر ملازم تھی، جہاں ان کی بیوی کے تشدد سے بچی کے دانت، بازو، ناک اور پسلیاں ٹوٹیں۔
پولیس حکام کا کہنا ہے کہ بچی کی میڈیکو لیگل رپورٹ آنے کے بعد مقدمے میں مزید دفعات شامل کی جائیں گی۔
دوسری طرف وفاقی پولیس نے کیس کی تحیقیقات کا آغاز کر دیا ہے، ذرائع کا کہنا ہے کہ وفاقی پولیس کی ٹیم سرگودھا پہنچ گئی، پولیس کا کہنا ہے کہ جج کا گھر بند ہے، اہلیہ بھی گھر پر نہیں، پولیس سرگودھا میں گرفتار شخص کا بیان بھی ریکارڈ کرے گی۔
جج کی اہلیہ کے مبینہ تشدد سے زخمی بچی کی حالت تشویشناک
جنرل اسپتال لاہور میں زیر علاج متاثرہ بچی کے ٹیسٹ شروع کر دیے گئے ہیں، ڈائریکٹر ایمرجنسی جنرل اسپتال ڈاکٹر جعفر شاہ کا کہنا ہے کہ بچی کے سر اور جسم کے دیگر حصوں پر زخم ہیں، ریڑھ کی ہڈی بھی متاثر لگتی ہے۔
ڈاکٹر جعفر شاہ کے مطابق آنکھوں کے زخم میں انفیکشن پھیل گیا ہے، پرانے ہونے کی وجہ سے زخم میں کیڑے بھی پڑ گئے ہیں، ابتدائی طبی معائنے کے مطابق زخم 6 ماہ پرانے ہیں، مزید ٹیسٹ کے بعد صورت حال واضح ہوگی۔
