کراچی: شہر قائد کے علاقے شاہ فیصل کالونی میں ڈمپر نے موٹر سائیکل سوار کو کچل دیا۔
تفصیلات کے مطابق کراچی کے علاقے شاہ فیصل کالونی کے قریب ڈمپر کی ٹکر سے موٹر سائیکل سوار جاں بحق ہوگیا، مقتول سید معاذ حافظ قرآن اور ایم بی اے فائنل ایئر کا طالب علم تھا۔
حادثے کے بعد مظاہرین نے احتجاج کرتے ہوئے گاڑیوں کے شیشے توڑ دئیے اور ڈمپر کو آگ لگادی، ڈمپر ڈرائیور فرار ہونے میں کامیاب ہوگیا۔
نمائندہ اے آر وائی نیوز کے مطابق سید معاذ کی عمر 24 سال تھی اور آج مقتول کا ایم بی اے فائنل ایئر کا پیپر تھا۔
اہلخانہ کا کہنا ہے کہ سید معاذ نجی کمپنی میں ملازمت کرتا تھا، موٹر سائیکل پر آفس جارہا تھا اور 2 ماہ بعد اس کی شادی طے تھی۔
سید معاذ کے اہلخانہ کا کہنا تھا کہ آئے روز شہر میں ڈمپر کی ٹکر سے شہری اپنی قیمتی جانوں سے ہاتھ دھو بیٹھتے ہیں لیکن متعلقہ حکام کی جانب سے کچھ نہیں کیا جاتا جو ایک سوالیہ نشان ہے۔
واضح رہے کہ گزشتہ سال جون میں بھی لانڈھی میں ڈمپر کی ٹکر سے بچہ جاں بحق ہوگیا تھا، مشتعل افراد کی جانب سے ڈمپر کو آگ لگادی گئی تھی۔
یاد رہے کہ گزشتہ سال اپریل میں کراچی کے علاقے گھگھر پھاٹک کے قریب تیز رفتار ڈمپر کی ٹکر سے 2 موٹر سائیکل سوار جاں بحق اور 2 زخمی ہوگئے تھے۔
نذیر شاہ کراچی میں اے آر وائی نیوز سے وابستہ سینئر صحافی اور کرائم رپورٹر ہیں، وہ 14 سال سے زائد عرصے سے اپنے شعبے میں مصروف عمل ہیں اور انویسٹیگیٹو نیوز بریکنگ میں مہارت رکھتے ہیں، اور کراچی کے جرائم اور پولیس نظام سے متعلق گہری سمجھ بوجھ کے حامل ہیں۔